జన గళం ఆంధ్రప్రదేశ్ డెస్క్: కెనడాలో జరిగిన కామన్వెల్త్ గేమ్స్ పవర్లిఫ్టింగ్ పోటీల్లో అద్భుతమైన ప్రతిభ కనబరిచి స్వర్ణ పతకం సాధించిన ఎన్టీఆర్ జిల్లా జి.కొండూరు మండలం వెంకటాపురం గ్రామానికి చెందిన సంకు కృపారావును మైలవరం శాసనసభ్యులు, టీడీపీ రాష్ట్ర అధికార ప్రతినిధి వసంత వెంకట కృష్ణప్రసాదు ఘనంగా అభినందించారు. జి.కొండూరులో నిర్వహించిన ప్రజాదర్బార్ కార్యక్రమంలో పాల్గొన్న ఎమ్మెల్యేను స్వర్ణ పతక విజేత కృపారావు మర్యాదపూర్వకంగా కలిసి తన ఆనందాన్ని పంచుకున్నారు. ఈ సందర్భంగా యువ క్రీడాకారుడు సాధించిన ఘనతను ఎమ్మెల్యే ప్రత్యేకంగా ప్రశంసించి, భవిష్యత్తులో మరెన్నో అంతర్జాతీయ పతకాలు సాధించాలని ఆకాంక్షించారు.
కామన్వెల్త్ వేదికపై త్రివర్ణ పతాకం ఎగరవేయడం ద్వారా కృపారావు రాష్ట్ర కీర్తిని ప్రపంచ స్థాయికి చాటారని ఎమ్మెల్యే కృష్ణప్రసాదు పేర్కొన్నారు. కఠోర శ్రమ, నిరంతర సాధన, పట్టుదలతో ఈ విజయం సాధించడం అభినందనీయమని, ఈయన విజయం రాష్ట్రంలోని యువ క్రీడాకారులకు ఎంతో స్ఫూర్తిదాయకమని అన్నారు. క్రీడాకారులలోని ప్రతిభను గుర్తించి ప్రోత్సహించే దిశగా ప్రభుత్వం ఇప్పటికే పి-4 కార్యక్రమం ద్వారా తగిన ఆర్థిక సాయం అందించినట్లు తెలిపారు. ఈ మేరకు ఎన్టీఆర్ జిల్లా కలెక్టర్ లక్ష్మిశకు లేఖ రాయగా, కృపారావుకు లక్ష రూపాయల ఆర్థిక సహాయం అందిందని గుర్తుచేశారు.
భవిష్యత్తులోనూ కృపారావుకు మరింత ప్రోత్సాహం అందించేందుకు మరియు క్రీడాకారులు ఆర్థిక ఇబ్బందులు ఎదుర్కోకుండా తగిన సహకారం అందేలా ప్రభుత్వ దృష్టికి తీసుకెళ్తామని ఎమ్మెల్యే హామీ ఇచ్చారు. తన విజయాన్ని గుర్తించి అభినందించిన ఎమ్మెల్యే వసంత కృష్ణప్రసాదుకు సంకు కృపారావు కృతజ్ఞతలు తెలుపుతూ, దేశానికి మరిన్ని పతకాలు తీసుకువచ్చేలా మరింత కష్టపడి సాధన చేస్తానని తెలిపారు. అంతర్జాతీయ స్థాయిలో ప్రతిభ చాటిన క్రీడాకారులను ప్రోత్సహించడం ద్వారా యువతలో క్రీడల పట్ల ఆసక్తి పెరుగుతుందని ఈ సందర్భంగా పలువురు అభిప్రాయపడ్డారు.
Slug: ntr-district-venkatapuram-sanku-kruparao-commonwealth-gold-medal-vasantha-krishna-prasad