జనగళం ఎంటర్టైన్మెంట్ డెస్క్: ప్రముఖ సినీ దర్శకులు, మెగా డైరెక్టర్ వి.వి. వినాయక్ జన్మదిన వేడుకలను డాక్టర్ బి.ఆర్. అంబేద్కర్ కోనసీమ జిల్లా రావులపాలెం మండలం ఈతకోట గ్రామంలో ఆయన అభిమానులు అత్యంత ఘనంగా నిర్వహించారు. వి.వి. వినాయక్ సేవా యూత్ సర్కిల్ అధ్యక్షులు, ప్రజాసేవకుడు గండ్రోతు దుర్గాసురేష్ ఆధ్వర్యంలో ఈ వేడుకలు ఉత్సాహభరిత వాతావరణంలో సాగాయి. ఈ సందర్భంగా గ్రామంలోని పలు ప్రముఖ ఆలయాల్లో ప్రత్యేక పూజలు నిర్వహించి దర్శకుడు ఆయురారోగ్యాలతో వర్ధిల్లాలని భగవంతుడిని ప్రార్థించారు.
వేడుకల్లో భాగంగా భవానీలు ప్రత్యేక ఫ్లకార్డులతో మెగా డైరెక్టర్ వినాయక్‌కు జన్మదిన శుభాకాంక్షలు తెలుపుతూ తమ అభిమానాన్ని చాటుకున్నారు. అనంతరం స్థానిక గ్రామ పంచాయతీ వీధిలోని కమ్యూనిటీ హాల్ రామాలయం వద్ద అభిమానులు భారీ కేక్ కట్ చేసి సంబరాలు జరుపుకున్నారు. వినాయక్ మరిన్ని విజయవంతమైన చిత్రాలను తెరకెక్కించి, సినీ రంగంలో మరింత ఉన్నత శిఖరాలను అధిరోహించాలని ఈ సందర్భంగా ఆకాంక్షించారు. ఆయన అందించిన అద్భుతమైన సినిమాలను గుర్తుచేసుకుంటూ అభిమానులు కేకులు తినిపించుకుంటూ ఆనందాన్ని పంచుకున్నారు.
ఈ కార్యక్రమంలో గ్రామ పెద్దలు, యువకులు, వివిధ రాజకీయ పార్టీల నాయకులు, వీఐవీ సేవా యూత్ సభ్యులు, భారీ సంఖ్యలో అభిమానులు, శ్రేయోభిలాషులు పాల్గొన్నారు. తెలుగు సినీ పరిశ్రమలో తనకంటూ ప్రత్యేక గుర్తింపు తెచ్చుకున్న వివి వినాయక్ సేవా కార్యక్రమాల్లోనూ ముందుంటారని వక్తలు కొనియాడారు. ఈతకోట గ్రామంలో జరిగిన ఈ జన్మదిన వేడుకలు సినీ వర్గాల్లోనూ, స్థానికంగానూ ప్రత్యేక ఆకర్షణగా నిలిచాయి.
Slug: konaseema-etakota-vv-vinayak-birthday-celebrations