జన గళం అమరావతి/మంగళగిరి బ్యూరో: ఆంధ్రప్రదేశ్ నగర పాలక, పురపాలక, నగర పంచాయతీ ఎన్నికల ఫలితాల్లో ఎన్డీఏ కూటమి పక్షాలకు దక్కుతున్న అఖండ విజయాలు తమ ప్రభుత్వ ప్రజాపాలనకు లభించిన సంపూర్ణ మద్దతు అని ఉప ముఖ్యమంత్రి, జనసేన పార్టీ అధ్యక్షులు శ్రీ కొణిదెల పవన్ కల్యాణ్ పేర్కొన్నారు. మంగళవారం మంగళగిరిలోని పార్టీ కేంద్ర కార్యాలయం నుంచి ఆయన ఒక అధికారిక ప్రకటన విడుదల చేశారు.
మౌలిక సదుపాయాల కల్పన, అభివృద్ధి, సంక్షేమ కార్యక్రమాల అమలు విషయంలో కూటమి ప్రభుత్వం అనుసరిస్తున్న విధానాల పట్ల పట్టణ, నగర ప్రజలు అమితమైన విశ్వాసం కనబరుస్తున్నారని ఈ మున్సిపల్ ఫలితాలు స్పష్టం చేస్తున్నాయని పవన్ కల్యాణ్ అన్నారు.
పవన్ కల్యాణ్ గారి అధికారిక పత్రికా ప్రకటనలోని ముఖ్యాంశాలు:
- ఈవీఎం అయినా.. బ్యాలెట్ అయినా విజయం కూటమిదే: సార్వత్రిక ఎన్నికల్లో ఓటమి పాలైన ప్రతిపక్ష వైకాపా ఈవీఎంలను నిందించిందని, ఇప్పుడు బ్యాలెట్ పద్ధతి ద్వారా చేపట్టిన స్థానిక సంస్థల ఎన్నికలలోనూ ప్రజలు అదే స్థాయి విజయాన్ని కూటమికి అందించారని గుర్తుచేశారు. దీని ద్వారా ఈవీఎం అయినా, బ్యాలెట్ అయినా ప్రజలు నిస్సందేహంగా కూటమి పక్షానే ఉన్నారని రుజువైందని స్పష్టం చేశారు.
- జనసేనకు దక్కిన బలమైన మద్దతుకు కృతజ్ఞతలు: మున్సిపల్ ఎన్నికల్లో జనసేన పార్టీకి దక్కిన అనూహ్య ఆదరణ, బలమైన మద్దతు ఎంతో విలువైనదని పేర్కొన్నారు. చైర్మన్, మేయర్ అభ్యర్థులకు దక్కిన భారీ విజయాలు, ఆధిక్యతలను పరిశీలిస్తుంటే పట్టణ ప్రజలు జనసేనకు ఇస్తున్న ప్రాధాన్యత స్పష్టమవుతోందని, ప్రజలు పార్టీ పట్ల ఉంచిన నమ్మకాన్ని ఎట్టి పరిస్థితుల్లోనూ నిలబెట్టుకుంటామని హామీ ఇచ్చారు.
- ఓటర్లకు ధన్యవాదాలు – శ్రేణులకు అభినందనలు: కూటమి తరఫున నిలిచిన అభ్యర్థులకు ఓటు వేసి గెలిపించిన పట్టణ, నగర ప్రజానీకానికి హృదయపూర్వక ధన్యవాదాలు తెలిపారు. అఖండ విజయం సాధించిన ప్రజాప్రతినిధులకు శుభాకాంక్షలు తెలుపుతూ, ఈ విజయం కోసం క్షేత్రస్థాయిలో అహర్నిశలు శ్రమించిన జనసేన, టీడీపీ, బీజేపీ నాయకులు మరియు కార్యకర్తలను ప్రత్యేకంగా అభినందించారు.
- రాష్ట్రాభివృద్ధికి సమష్టి సంకల్పం: గౌరవ ప్రధాని శ్రీ నరేంద్ర మోదీ నేతృత్వంలోని కేంద్ర ప్రభుత్వం అందిస్తున్న సంపూర్ణ సహకారంతో, అనుభవజ్ఞులైన గౌరవ ముఖ్యమంత్రి శ్రీ నారా చంద్రబాబు నాయుడు గారి మార్గదర్శకత్వంలో ఆంధ్రప్రదేశ్ రాష్ట్రాన్ని మరింత ప్రగతి పథంలోకి తీసుకెళ్తామని పవన్ కల్యాణ్ పునరుద్ఘాటించారు.
- ఎంపీటీసీ, జెడ్పీటీసీల్లోనూ ఇదే జోరు: మున్సిపాలిటీ ఎన్నికల్లో సాధించిన చారిత్రక ఘన విజయాన్ని రాబోయే ఎంపీటీసీ, జెడ్పీటీసీ ఎన్నికల్లోనూ కొనసాగించి క్లీన్ స్వీప్ సాధిస్తామనే ప్రగాఢ విశ్వాసాన్ని వ్యక్తం చేశారు.