జన గళం ఆంధ్రప్రదేశ్ డెస్క్: ఎన్టీఆర్ జిల్లా తిరువూరు రెవెన్యూ డివిజన్ పరిధిలో ప్రభుత్వం అత్యంత ప్రతిష్టాత్మకంగా చేపడుతున్న భూముల రీసర్వే ప్రక్రియ ముమ్మరంగా సాగుతోంది. ఇందులో భాగంగా తిరువూరు రెవెన్యూ డివిజన్ అధికారి ఏ. కుమార్ ఏ. కొండూరు మండలం కోడూరు రెవెన్యూ గ్రామంలో జరుగుతున్న రీసర్వే గ్రౌండ్ ట్రూథింగ్ పనులను శనివారం క్షేత్రస్థాయిలో పరిశీలించారు. రీసర్వే క్షేత్రస్థాయి పరిశీలన ప్రక్రియ సజావుగా సాగుతున్న తీరును అధికారులను అడిగి తెలుసుకుంటూ తగు సూచనలు జేశారు.
ఈ సందర్భంగా ఆర్డీవో ఏ. కుమార్ మాట్లాడుతూ, రాష్ట్ర ప్రభుత్వం అత్యంత పారదర్శకంగా చేపడుతున్న ఈ రీసర్వే కార్యక్రమం ద్వారా రైతుల భూములకు శాశ్వత రక్షణ లభిస్తుందని స్పష్టం చేశారు. రైతులందరూ తమ భూములకు సంబంధించిన వివరాలను క్షుణ్ణంగా పరిశీలించుకోవాలని, ప్రభుత్వం కల్పిస్తున్న ఈ సువర్ణ అవకాశాన్ని ప్రతి ఒక్కరూ పూర్తిగా సద్వినియోగం చేసుకోవాలని పిలుపునిచ్చారు. గ్రామ సర్వేయర్లు ఎక్కడా పొరపాట్లకు తావులేకుండా, రైతుల సమక్షంలోనే పకడ్బందీగా భూముల కొలతలు చేపట్టాలని ఆదేశించారు. భూముల సరిహద్దులు, విస్తీర్ణం తదితర కీలక వివరాలను క్షుణ్ణంగా పరిశీలించి రికార్డుల్లో నమోదు చేయాలని స్పష్టం చేశారు.
రీసర్వే ప్రక్రియలో ఎలాంటి సాంకేతిక లోపాలు లేదా భూ వివాదాలు తలెత్తకుండా సిబ్బంది అప్రమత్తంగా వ్యవహరించాలని ఆర్డీవో హెచ్చరించారు. రైతులకు ఏవైనా సందేహాలు లేదా సమస్యలు ఉంటే వెంటనే వాటిని క్షేత్రస్థాయిలోనే పరిష్కరించేందుకు అవసరమైన చర్యలు తీసుకోవాలని రెవెన్యూ సిబ్బందిని ఆదేశించారు. ఎటువంటి ఇబ్బందులు తలెత్తకుండా రీసర్వేను అత్యంత పారదర్శకంగా పూర్తి చేయాలని స్పష్టం చేశారు. ఈ కార్యక్రమంలో స్థానిక రెవెన్యూ అధికారులు, గ్రామ సర్వేయర్లు మరియు రైతులు పెద్ద సంఖ్యలో పాల్గొన్నారు.
Slug: ntr-district-tiruvuru-rdo-kumar-resurvey-ground-truthing-inspection