జన గళం ఆంధ్రప్రదేశ్ డెస్క్: కృష్ణా జిల్లా పెడన నియోజకవర్గంలో రైతాంగానికి ఊరటనిచ్చే అత్యంత చారిత్రాత్మక నిర్ణయం వెలువడింది. సూపర్ ఎల్నినో (Super El Nino) ప్రభావంతో వర్షాభావం కారణంగా పంటలు దెబ్బతిని తీవ్రంగా నష్టపోయిన రైతులను ఆదుకునేందుకు పెడన నియోజకవర్గంలోని నాలుగు మండలాలను కరువు మండలాలుగా ప్రకటించాలని కోరుతూ పెడన శాసనసభ్యులు (ఎమ్మెల్యే) శ్రీ కాగిత కృష్ణ ప్రసాద్ గారు రాష్ట్ర ముఖ్యమంత్రివర్యులు గౌరవనీయులైన శ్రీ నారా చంద్రబాబు నాయుడు గారి దృష్టికి తీసుకెళ్లారు. రైతుల కష్టాలను అర్థం చేసుకున్న ప్రభుత్వం తక్షణమే స్పందించి ఈ నిర్ణయం తీసుకుంది.
పెడన నియోజకవర్గ తెలుగుదేశం పార్టీ కార్యాలయంలో నిర్వహించిన ముఖ్య నాయకుల ప్రత్యేక సమావేశంలో రైతులు ఎదుర్కొంటున్న ఇబ్బందికర పరిస్థితులను క్షుణ్ణంగా చర్చించారు. ఈ నేపథ్యంలో అన్నదాతలను ఆదుకోవాలని కోరుతూ ఎమ్మెల్యే కాగిత కృష్ణ ప్రసాద్ గారు ప్రభుత్వానికి పంపిన విజ్ఞప్తికి సానుకూల స్పందన లభించింది. రైతుల ప్రయోజనాలను అత్యంత ప్రాధాన్య అంశంగా పరిగణించిన గౌరవ ముఖ్యమంత్రి శ్రీ నారా చంద్రబాబు నాయుడు గారు, పెడన నియోజకవర్గంలోని నాలుగు మండలాలను కరువు ప్రాంతాలుగా ప్రకటిస్తూ నిర్ణయం తీసుకున్నారు. గత మల్లేశ్వరం, ప్రస్తుత పెడన నియోజకవర్గ చరిత్రలో ఒకేసారి నాలుగు మండలాలను కరువు మండలాలుగా ప్రకటించడం ఇదే తొలిసారి కావడం గమనార్హం.
అన్నదాతల సంక్షేమమే ధ్యేయంగా ప్రభుత్వం తీసుకున్న ఈ చొరవ పట్ల నియోజకవర్గంలోని రైతాంగం హర్షం వ్యక్తం చేసింది. క్షేత్రస్థాయిలో రైతుల సమస్యలను స్వయంగా పరిశీలించి, వాటిని ప్రభుత్వ దృష్టికి తీసుకువెళ్లి, తక్షణ పరిష్కారం లభించేలా శక్తివంచన లేకుండా కృషి చేసిన పెడన శాసనసభ్యులు శ్రీ కాగిత కృష్ణ ప్రసాద్ గారికి నియోజకవర్గంలోని మొత్తం రైతాంగం మరియు పార్టీ శ్రేణులు ప్రత్యేక కృతజ్ఞతలు తెలిపారు. ప్రభుత్వ సహాయంతో కష్టకాలంలో ఉన్న రైతులకు త్వరలోనే తగిన ఉపశమనం లభిస్తుందని నాయకులు ఆశాభావం వ్యక్తం చేశారు.
Slug: pedana-constituency-four-mandals-declared-drought-hit-cm-chandrababu-mla-kagitha