జన గళం లీగల్/ఆటోమోటివ్ బ్యూరో: ప్రముఖ ఆటోమొబైల్ దిగ్గజం మహీంద్రా కంపెనీకి చెందిన కార్ల అధికారిక డీలర్ ‘ఆటోమోటివ్’ షోరూమ్స్ మరియు సర్వీస్ సెంటర్ల వినియోగదారుల వ్యతిరేక విధానాలపై ప్రముఖ న్యాయవాది సుంకర నరేష్ తీవ్రస్థాయిలో సమర శంఖారావం పూరించారు. వాహనాల అమ్మకాలు, సర్వీసింగ్ మరియు వినియోగదారుల హక్కుల ఉల్లంఘనలపై రాజీలేని పోరాటం చేస్తామని స్పష్టం చేశారు. గతంలో టొయోటా షోరూమ్స్ వ్యవహారంలో చట్టపరంగా తగిన గుణపాఠం చెప్పిన విషయాన్ని గుర్తుచేస్తూ, కస్టమర్లను మోసం చేస్తున్న ఆటోమోటివ్ డీలర్‌షిప్‌కు సైతం అదే గతి పడుతుందని హెచ్చరించారు.
వినియోగదారులకు నాణ్యమైన సేవలందించడంలో నిర్లక్ష్యం వహించడం, లోపభూయిష్టమైన వాహనాల విక్రయాలు, సర్వీసింగ్ పేరిట అధిక ఛార్జీలు వసూలు చేస్తూ మోసాలకు పాల్పడే ఏ ఒక్క డీలర్‌నూ వదిలిపెట్టే ప్రసక్తే లేదని స్పష్టం చేశారు. బాధితులకు న్యాయం జరిగే వరకు న్యాయస్థానాలు, వినియోగదారుల ఫోరమ్‌ల వేదికగా ఈ పోరాటానికి శాశ్వత ముగింపు పలికేవరకు విశ్రమించబోమని, ఇందులో ‘తగ్గేదే లే’ అంటూ గట్టి హెచ్చరికలు జారీ చేశారు. వినియోగదారుల హక్కులను కాపాడటంలో చట్టపరమైన అన్ని చర్యలు తీసుకుంటామని ఆయన తేల్చిచెప్పారు.
