రచన: జన గళం అమరావతి డెస్క్: ఆంధ్రప్రదేశ్ రాజధాని అమరావతి పరిధిలో అత్యంత ప్రతిష్టాత్మకమైన భారీ ప్రాజెక్టు అయిన ‘అమరావతి ఔటర్ రింగ్ రోడ్డు’ (ORR) నిర్మాణ పనులకు కేంద్ర ఉపరితల రవాణా మరియు జాతీయ రహదారుల ప్రాధికార సంస్థ (NHAI) శ్రీకారం చుట్టింది. ప్రాజెక్టును వేగవంతం చేసేందుకు మొత్తం పనులను 4 వేర్వేరు ప్యాకేజీలుగా విభజిస్తూ అధికారికంగా టెండర్లను ఆహ్వానించింది. లింక్ రోడ్డుతో కలిపి మొత్తం 195 కిలోమీటర్ల మేర 6 లేన్ల ప్రపంచస్థాయి యాక్సెస్-కంట్రోల్డ్ రహదారిని నిర్మించనున్నారు.
ఈ ప్రాజెక్టును నాలుగు ప్రధాన ప్యాకేజీలుగా విభజించారు: కంచికచర్ల – నందిగామ (27 కి.మీ), నందిగామ – దావులూరు (56 కి.మీ), కొలవెన్ను – కోర్నెపాడు (55 కి.మీ), మరియు కోర్నెపాడు – కంచికచర్ల (55 కి.మీ) మార్గాలుగా నిర్ణయించారు. ఈ ప్రాజెక్టు సివిల్ నిర్మాణ పనుల అంచనా వ్యయం రూ. 11,537 కోట్లు కాగా, ప్రాజెక్ట్ అప్రైజల్ నాటికి మొత్తం అంచనా బిడ్ వ్యయం రూ. 13,091 కోట్లుగా నిర్ణయించారు. అర్హత గల నిర్మాణ సంస్థలు నవంబర్ 18వ తేదీ లోపు తమ బిడ్లను సమర్పించాలని ఎన్‌హెచ్‌ఏఐ స్పష్టం చేసింది. అమరావతి, విజయవాడ, గుంటూరు నగరాలతో పాటు మైలవరం, కంచికచర్ల, ఉయ్యూరు, చేబ్రోలు, పొత్తూరు ప్రాంతాలను అనుసంధానించే ఈ భారీ ఓఆర్‌ఆర్ నిర్మాణం రాజధాని ప్రాంత అభివృద్ధిని సరికొత్త స్థాయికి తీసుకెళ్లనుంది.
