జన గళం ఆంధ్రప్రదేశ్ డెస్క్: కైకలూరు శాసనసభ్యులు, మాజీ మంత్రివర్యులు మరియు ప్రభుత్వ అస్యూరెన్స్ కమిటీ చైర్మన్ డాక్టర్ కామినేని శ్రీనివాస్ సోమవారం నియోజకవర్గంలో పలు అధికారిక, సేవా మరియు అభివృద్ధి కార్యక్రమాలలో బిజీబిజీగా పాల్గొననున్నారు. ఆదివారం రాత్రి వరహాపట్నంలోని తన నివాసానికి చేరుకున్న ఆయన, సోమవారం ఉదయం నుంచి పలు కార్యక్రమాలకు శ్రీకారం చుట్టనున్నారు. ఇందులో భాగంగా ఉదయం పది గంటలకు వరహాపట్నం గ్రామ అంగన్వాడీ కేంద్రంలో సేవా సంకల్ప అభియాన్ కార్యక్రమంలో భాగంగా నిర్వహిస్తున్న సామూహిక శ్రీమంతం వేడుకలకు ఆయన ముఖ్య అతిథిగా హాజరై గర్భిణులను ఆశీర్వదించనున్నారు.
అనంతరం ఉదయం పదకొండు గంటలకు పల్లె పండగ కార్యక్రమంలో భాగంగా వరహాపట్నం గ్రామంలో రెండు సిసి రోడ్ల నిర్మాణ పనులకు ఆయన భూమిపూజ నిర్వహించనున్నారు. గ్రామీణ ప్రాంతాల మౌలిక వసతుల అభివృద్ధికి కూటమి ప్రభుత్వం ఇస్తున్న ప్రాధాన్యతలో భాగంగా ఈ రోడ్ల నిర్మాణాలు చేపట్టనున్నట్లు తెలిపారు. అదేవిధంగా సాయంత్రం మూడు గంటల ముప్పై నిమిషాలకు ముదినేపల్లి మండల విద్యాశాఖ అధికారి కార్యాలయంలో ప్రపంచ ఉపాధ్యాయుల దినోత్సవం సందర్భంగా ఏర్పాటు చేసిన మండల ఉపాధ్యాయుల ప్రత్యేక సన్మాన కార్యక్రమంలో ఆయన పాల్గొని ఉపాధ్యాయులను ఘనంగా సత్కరించనున్నారు.
సాయంత్రం నాలుగు గంటలకు కైకలూరు సీతారామ కళ్యాణ మండపంలో శాసనమండలి సభ్యులు పంచుమర్తి అనురాధతో కలిసి తెలుగుదేశం, భారతీయ జనతా పార్టీ మరియు జనసేన కూటమి పార్టీల నియోజకవర్గ ముఖ్య నాయకులతో కలిసి ప్రత్యేక సమావేశం నిర్వహించనున్నారు. ఈ సమావేశంలో స్థానిక అభివృద్ధి పనులు, ప్రజా సమస్యల పరిష్కారం మరియు భవిష్యత్ కార్యక్రమాలపై కూటమి శ్రేణులతో చర్చించనున్నారు. ప్రజలకు అందుబాటులో ఉంటూ నిత్యం అభివృద్ధి కార్యక్రమాలను ముందుకు తీసుకువెళ్తున్న డాక్టర్ కామినేని శ్రీనివాస్ పర్యటనకు సంబంధించి క్యాంపు కార్యాలయం వివరాలను వెల్లడించింది.
Slug: dr-kamineni-srinivas-kaikaluru-tour-schedule