రచన: TVR విఠల్, జన గళం విజయవాడ డెస్క్: ఆంధ్రప్రదేశ్ రాష్ట్రంలో త్వరలో జరగనున్న స్థానిక సంస్థల ఎన్నికలకు సంబంధించి సామాజిక మాధ్యమాల్లో జరుగుతున్న తప్పుడు ప్రచారాలపై రాష్ట్ర ఎన్నికల సంఘం (SEC) తీవ్ర ఆగ్రహం వ్యక్తం చేసింది. ఎన్నికల షెడ్యూల్, విధివిధానాల పేరిట ప్రజలను తప్పుదోవ పట్టించేలా అసత్య వార్తలు, ఫేక్ ప్రచారాలు సృష్టిస్తున్న గుర్తుతెలియని వ్యక్తులపై కఠిన చట్టపరమైన చర్యలు తీసుకోవాలని కోరుతూ ఎన్నికల సంఘం అధికారులు విజయవాడ సైబర్ క్రైమ్ పోలీస్ స్టేషన్‌లో అధికారికంగా ఫిర్యాదు చేశారు.
గత కొద్దిరోజులుగా వాట్సాప్, ఫేస్‌బుక్ తదితర సోషల్ మీడియా వేదికల్లో స్థానిక సంస్థల ఎన్నికల తేదీలు ఇవేనంటూ కొందరు ఆకతాయిలు ఫేక్ నోటిఫికేషన్లు, తప్పుడు ప్రచారాలను వైరల్ చేస్తున్నట్లు ఈసీ గుర్తించింది. రాజ్యాంగబద్ధమైన ఎన్నికల ప్రక్రియపై ప్రజలు, రాజకీయ పార్టీల్లో గందరగోళం సృష్టించేందుకు ఇలాంటి కుట్రపూరిత ప్రచారాలకు పాల్పడుతున్నారని అధికారులు తమ ఫిర్యాదులో పేర్కొన్నారు. అధికారిక ప్రకటన వెలువడేవరకు సామాజిక మాధ్యమాల్లో వచ్చే ఎలాంటి తప్పుడు వార్తలను నమ్మవద్దని ప్రజలకు సూచించారు. ఈసీ ఫిర్యాదు మేరకు కేసు నమోదు చేసుకున్న విజయవాడ సైబర్ క్రైమ్ పోలీసులు, అసత్య పోస్టులు పెట్టిన ఖాతాలు, వాటిని వైరల్ చేసిన ఐపీ అడ్రస్‌లను గుర్తించేందుకు లోతైన దర్యాప్తు ప్రారంభించారు.
