రచన: TVR విఠల్, జన గళం వరంగల్ డెస్క్: ఖమ్మం-వరంగల్-నల్గొండ పట్టభద్రుల శాసనమండలి (MLC) ఎన్నికల సమరానికి జనసేన పార్టీ సమాయత్తమవుతోంది. ఉమ్మడి వరంగల్ జిల్లా కేంద్రంలో మంగళవారం పట్టభద్రుల ఎమ్మెల్సీ ఎన్నికల సన్నాహక సమావేశం ఉత్సాహభరిత వాతావరణంలో జరిగింది. జనసేన పార్టీ పట్టభద్రుల ఎమ్మెల్సీ అభ్యర్థి, పార్టీ ఆర్గనైజింగ్ సెక్రటరీ డాక్టర్ గడల శ్రీనివాసరావు ఈ సమావేశానికి అధ్యక్షత వహించారు.
ఈ సమావేశంలో జనసేన పార్టీ ప్రచార కార్యదర్శి ఆర్కే సాగర్ ముఖ్య అతిథిగా పాల్గొన్నారు. పట్టభద్రుల ఎమ్మెల్సీ ఎన్నికలను అత్యంత ప్రతిష్టాత్మకంగా తీసుకుని విస్తృతంగా ఓటరు నమోదు కార్యక్రమాన్ని చేపట్టాలని నాయకులు పిలుపునిచ్చారు. ప్రతి విద్యావంతుడిని, పట్టభద్రుడిని నేరుగా కలిసి జనసేన సిద్ధాంతాలను వివరించాలని, క్షేత్రస్థాయిలో పార్టీ యంత్రాంగాన్ని మరింత పటిష్టం చేయాలని దిశానిర్దేశం చేశారు. నిరుద్యోగం, ఉద్యోగ నోటిఫికేషన్లు, పట్టభద్రుల సమస్యల పరిష్కారం కోసం జనసేన నిరంతరం పోరాడుతుందని స్పష్టం చేశారు. ఈ కార్యక్రమంలో జనసేన రాష్ట్ర నేతలు మచ్చా సుధాకర్, దామోదర్ రెడ్డి, మీసాల శ్రీనివాసరావు, రాము యాదవ్, మండపాక కావ్య, ప్రేమ్ గాంధీ, రవీష్, మిరియాల రామకృష్ణ, బండి నరేష్, గాదె పృథ్వీ, కరాటే ప్రభాకర్, బెక్కం జనార్దన్, డా. రాజేంద్రప్రసాద్, గడ్డం రాకేష్, సునీల్, అమంచి, రవితేజ తదితరులతో పాటు ఉమ్మడి జిల్లా నాయకులు, జనసైనికులు, వీర మహిళలు పెద్ద సంఖ్యలో పాల్గొన్నారు.
