రచన: మల్లికార్జున్, జన గళం తిరువూరు డెస్క్: ఎన్టీఆర్ జిల్లా తిరువూరు నియోజకవర్గంలో అధికార తెలుగుదేశం పార్టీ నేతల మధ్య అంతర్గత ఆధిపత్య పోరు రచ్చకెక్కింది. గత ఏడాదిన్నర కాలంగా నివురుగప్పిన నిప్పులా ఉన్న విభేదాలు తాజాగా అధికారిక వేదికపైనే బహిర్గతమవడం జిల్లా రాజకీయ వర్గాల్లో తీవ్ర చర్చనీయాంశంగా మారింది. ఏ.కొండూరులో రూ. 94.97 కోట్ల వ్యయంతో నిర్మించిన విద్యుత్ సబ్స్టేషన్ ప్రారంభోత్సవ కార్యక్రమం ఇందుకు వేదికగా నిలిచింది.
రాష్ట్ర విద్యుత్ శాఖ మంత్రి గొట్టిపాటి రవికుమార్ ముఖ్య అతిథిగా హాజరైన ఈ కార్యక్రమంలో విజయవాడ ఎంపీ కేశినేని శివనాథ్ (చిన్ని), స్థానిక ఎమ్మెల్యే కొలికపూడి శ్రీనివాసరావు ఒకే వేదికను పంచుకున్నారు. అయితే వేదికపై ఒకరినొకరు కనీసం పలకరించుకోకపోవడం, ముఖాముఖి చూసుకోకపోవడం వారి మధ్య నెలకొన్న తీవ్రస్థాయి ‘కోల్డ్ వార్’ను కళ్లకు కట్టింది. అధికారిక కార్యక్రమం ముగియగానే ఎమ్మెల్యే కొలికపూడి వెంటనే వేదిక దిగి అక్కడి నుంచి వెళ్లిపోగా, ఎంపీ కేశినేని చిన్ని అక్కడే ఉండి మీడియాతో మాట్లాడటం నేతల మధ్య ఉన్న పెను అంతరాన్ని స్పష్టం చేసింది.
ఈ రాజకీయ వివాదానికి ప్రధాన కేంద్రం ‘తిరువూరు మున్సిపల్ చైర్పర్సన్’ పదవి వ్యవహారమేనని స్థానికంగా జోరుగా ప్రచారం సాగుతోంది. ఎస్సీ రిజర్వ్డ్ నియోజకవర్గమైన తిరువూరులో స్థానిక సంస్థల పదవులు తన వర్గానికే దక్కాలని, నియోజకవర్గ వ్యవహారాల్లో తన మాటే అంతిమం కావాలని ఎమ్మెల్యే భావిస్తుండగా.. ఎంపీ వర్గం జోక్యం చేసుకోవడం ఆయన అసంతృప్తికి కారణమైనట్లు తెలుస్తోంది. స్థానిక సంస్థల పదవుల ఎంపిక వేళ ఈ ఆధిపత్య పోరు తారాస్థాయికి చేరింది. పార్టీ కేడర్లో అయోమయం నెలకొనకముందే అధిష్టానం జోక్యం చేసుకుని ఈ అంతర్గత విభేదాలకు ఎలా ముగింపు పలుకుతుందో వేచి చూడాల్సి ఉంది.