రచన: జన గళం బంటుమిల్లి / కృష్ణా డెస్క్: కృష్ణా జిల్లా పెడన నియోజకవర్గ పరిధిలోని నాలుగు మండలాలను తక్షణమే కరువు మండలాలుగా ప్రకటించి అన్నదాతలను ఆదుకోవాలని ఆంధ్రప్రదేశ్ రైతు సంఘం కృష్ణా జిల్లా కమిటీ (AIKS అనుబంధం) డిమాండ్ చేసింది. ఈ మేరకు రైతు సంఘం జిల్లా ప్రధాన కార్యదర్శి గౌరిశెట్టి నాగేశ్వరరావు ఆధ్వర్యంలో నాయకులు బంటుమిల్లి మండల తహసీల్దార్‌కు లిఖితపూర్వక వినతిపత్రాన్ని సమర్పించారు.
ఈ సందర్భంగా రైతు సంఘం నేతలు మాట్లాడుతూ.. ప్రభుత్వం, అధికారుల ప్రకటనలతో రైతులు జూన్, జూలై నెలల్లో విత్తనాలు చల్లి నారుమళ్లు పోసుకుని సాగు ప్రారంభించారని తెలిపారు. అయితే, ఎల్ నినో (EL-NINO) ప్రభావం తీవ్రంగా ఉండటంతో తీవ్ర వర్షాభావం ఏర్పడి, కాలువలకు సాగునీరు అందక తీవ్ర ఇబ్బందులు ఎదురయ్యాయని వివరించారు. నీటి కొరత వల్ల వరి పంట ఎండిపోవడంతో రైతులు రెండు, మూడు సార్లు తిరిగి నాట్లు వేయాల్సి వచ్చిందని, ఫలితంగా అన్నదాతలు తీవ్ర ఆర్థిక నష్టాల్లో కూరుకుపోయారని ఆవేదన వ్యక్తం చేశారు.
ప్రస్తుత విపత్కర పరిస్థితులను పరిగణనలోకి తీసుకుని బంటుమిల్లి, కృత్తివెన్ను, పెడన, గూడూరు మండలాలను తక్షణమే కరువు మండలాలుగా ప్రకటించాలని వారు కోరారు. అంతేకాకుండా, సొంత మరియు కౌలు రైతులకు రూ.3 లక్షల వరకు ఉన్న వ్యవసాయ రుణాలను కేంద్ర, రాష్ట్ర ప్రభుత్వాలు రద్దు చేయాలని డిమాండ్ చేశారు. ప్రస్తుతం బంటుమిల్లి మెయిన్ ఛానల్ పరిధిలో పంటలు కాపాడేందుకు వంతులవారీ విధానం ద్వారా పూర్తిస్థాయిలో సాగునీరు విడుదల చేయాలని ప్రభుత్వానికి విజ్ఞప్తి చేశారు. ఈ కార్యక్రమంలో రైతు సంఘం ప్రతినిధులు కె. నాగరాజు, జి. ఆంజనేయులు, జి. నారాయణరావు, జి. ప్రసాద్, గణేశ్ బాబు, నాగబాబు తదితరులు పాల్గొన్నారు.