రచన: జన గళం పెడన డెస్క్: దేశ రక్షణ కోసం సరిహద్దుల్లో కాపలా కాసే సైనికుడి త్యాగాన్ని, దేశ ప్రజల ఆకలి తీర్చేందుకు నిరంతరం శ్రమించే అన్నదాత కష్టాన్ని సమానంగా గౌరవిస్తూ ‘జై జవాన్ – జై కిసాన్’ నినాదంతో యావత్ భారతదేశాన్ని ఏకతాటిపైకి తెచ్చిన నిరాడంబర దార్శనికుడు, భారత మాజీ ప్రధాని భారతరత్న శ్రీ లాల్ బహదూర్ శాస్త్రి అని పెడన నియోజకవర్గ నాయకులు లింగం నాగేశ్వరరావు కొనియాడారు. లాల్ బహదూర్ శాస్త్రి జయంతిని పురస్కరించుకుని శుక్రవారం ఆయన మహనీయుని చిత్రపటానికి పుష్పాంజలి ఘటించి ఘనంగా నివాళులర్పించారు.
ఈ సందర్భంగా లింగం నాగేశ్వరరావు మాట్లాడుతూ.. దేశానికి రెండో ప్రధానమంత్రిగా క్లిష్ట పరిస్థితుల్లో బాధ్యతలు చేపట్టిన శాస్త్రి గారు చూపిన నిష్కళంక నిజాయితీ, అంకితభావం, నిరాడంబర జీవనం నేటి సమాజానికి, ప్రజాప్రతినిధులకు ఎల్లప్పుడూ ఆదర్శప్రాయమని పేర్కొన్నారు. దేశ స్వయం సమృద్ధికి, రైతు సంక్షేమానికి ఆయన వేసిన బాటలు నేటికీ దేశాభివృద్ధికి చోదక శక్తులుగా నిలిచాయన్నారు. వ్యవసాయ సంక్షోభం, కరువు వంటి గడ్డు పరిస్థితులు ఎదురవుతున్న ప్రస్తుత తరుణంలో శాస్త్రి గారి రైతాంగ అనుకూల ఆలోచనలను ఆచరణలో పెట్టడమే ఆయనకు అందించే నిజమైన నివాళి అని స్పష్టం చేశారు. మహనీయుని ఆశయాలను స్మరిస్తూ ప్రజాసేవలో ముందడుగు వేయాలని పిలుపునిచ్చారు.
