రచన: జన గళం పెడన డెస్క్: వర్షాభావ పరిస్థితులు, తీవ్ర ఎల్ నినో ప్రభావంతో పంటలు దెబ్బతిని నష్టాల్లో కూరుకుపోయిన పెడన నియోజకవర్గ రైతాంగానికి కూటమి ప్రభుత్వం కొండంత భరోసా కల్పించిందని తెలుగుదేశం పార్టీ కృష్ణా జిల్లా అధికార ప్రతినిధి కూనసాని వెంకట రత్నారావు (చిన్న) పేర్కొన్నారు. గత బుధవారం పెడన నియోజకవర్గ ముఖ్య నాయకుల సమావేశంలో క్షేత్రస్థాయి పరిస్థితులపై సమగ్రంగా చర్చించి, రైతులను ఆదుకునేందుకు నియోజకవర్గంలోని నాలుగు మండలాలను కరువు మండలాలుగా ప్రకటించాలని శాసనసభ్యులు కాగిత కృష్ణప్రసాద్ ఏకగ్రీవ తీర్మానం చేశారు. ఈ తీర్మానాన్ని ఆయన స్వయంగా రాష్ట్ర ముఖ్యమంత్రి నారా చంద్రబాబు నాయుడు దృష్టికి తీసుకెళ్లడంతో ప్రభుత్వం వెంటనే సానుకూలంగా స్పందించి నాలుగు మండలాలనూ కరువు ప్రాంతాలుగా ప్రకటిస్తూ నిర్ణయం తీసుకుంది.
ఎమ్మెల్యే కాగిత కృష్ణప్రసాద్ సమయస్ఫూర్తితో స్పందించి ప్రభుత్వ స్థాయిలో ప్రత్యేక చొరవ చూపడం వల్లే ఇంత త్వరితగతిన రైతులకు అధికారిక ఊరట లభించిందని స్థానిక రైతాంగం హర్షం వ్యక్తం చేస్తోందని కూనసాని చిన్న తెలిపారు. పెడన చరిత్రలోనే తొలిసారిగా నాలుగు మండలాలకూ ఒకేసారి కరువు సాయం అందేలా మార్గం సుగమం కావడంపై నియోజకవర్గంలోని రైతులు, రైతు సంఘాల ప్రతినిధులు ఎమ్మెల్యే కాగిత కృష్ణప్రసాద్‌ను కలిసి మనస్ఫూర్తిగా ధన్యవాదాలు తెలియజేశారు. సంక్షోభ సమయంలో అన్నదాతలకు వెన్నంటి నిలిచి సమస్యను పరిష్కరించిన ఎమ్మెల్యే కృష్ణప్రసాద్‌కు, రైతుల పక్షాన నిలిచిన సీఎం చంద్రబాబు నాయుడుకు కూటమి ప్రజాప్రతినిధులు, పార్టీ శ్రేణులు ప్రత్యేక కృతజ్ఞతలు తెలిపాయి.
