రచన: జన గళం బంటుమిల్లి/గుడ్లవల్లేరు డెస్క్: ప్రతిష్టాత్మక “25 సంవత్సరాల సేవా సంకల్ప అభియాన్ – నేను కలలుగన్న భారతదేశం” కార్యక్రమంలో భాగంగా శనివారం గుడ్లవల్లేరు పాలిటెక్నిక్ కళాశాల వేదికగా నిర్వహించిన కృష్ణా జిల్లా స్థాయి డిబేటింగ్ (వాదోపవాదాల) పోటీలలో బంటుమిల్లికి చెందిన సెయింట్ జాన్స్ హైస్కూల్ విద్యార్థిని కె. కుసుమాంజలి అద్వితీయ ప్రతిభ కనబరిచి జిల్లా స్థాయిలో సీనియర్స్ విభాగంలో ప్రథమ బహుమతిని కైవసం చేసుకుంది.
జిల్లా వ్యాప్తంగా పలు మండలాల నుంచి విచ్చేసిన ఉత్తమ విద్యార్థులతో పోటీపడి, ‘నేను కలలుగన్న భారతదేశం’ అనే అంశంపై ఆలోచింపజేసే వాదనలు, వాగ్ధాటితో న్యాయనిర్ణేతలను మెప్పించి కుసుమాంజలి అగ్రస్థానంలో నిలిచింది. ఈ సందర్భంగా ఏర్పాటు చేసిన బహుమతుల ప్రదానోత్సవంలో జిల్లా విద్యాశాఖ అధికారి (డీఈవో) యు.వి. సుబ్బారావు చేతుల మీదుగా ఆమె ప్రశంసా పత్రం, మెమెంటో అందుకుంది. జిల్లా స్థాయిలో ప్రథమ స్థానాన్ని కైవసం చేసుకోవడం ద్వారా ఈనెల 9వ తేదీన రాజధాని అమరావతిలో జరిగే రాష్ట్రస్థాయి పోటీల్లో కృష్ణా జిల్లా తరఫున ప్రాతినిధ్యం వహించేందుకు కుసుమాంజలి అర్హత సాధించినట్లు పాఠశాల డైరెక్టర్ సాబు జాన్ వెల్లడించారు. జిల్లా స్థాయిలో అగ్రస్థానంలో నిలిచిన విద్యార్థినిని పాఠశాల ప్రిన్సిపాల్ ఝాన్సీ సాబు, డైరెక్టర్ సాబు జాన్, ఉపాధ్యాయులు గౌతమి, సురేష్, తల్లిదండ్రులు మరియు తోటి విద్యార్థులు ఘనంగా అభినందించారు.
