జన గళం అంతర్జాతీయ డెస్క్: పశ్చిమాసియాలో ఉద్రిక్తతలు కొనసాగుతున్న వేళ ఇరాన్ ప్రభుత్వం కీలక ప్రకటన చేసింది. తాము యుద్ధ సమయంలో స్వాధీనం చేసుకున్న అమెరికా, ఇజ్రాయెల్‌లకు చెందిన వాణిజ్య నౌకలతో పాటు వాటిలోని సరుకును బహిరంగ వేలం వేసి విక్రయించాలని నిర్ణయించింది. ఈ మేరకు ఇరాన్ న్యాయవ్యవస్థకు చెందిన ఉన్నతాధికారి ఒకరు అధికారికంగా వివరాలు వెల్లడించారు.
ఇరాన్ న్యాయవాదుల కేంద్రం అధిపతి హసన్ అబ్దోలియాన్‌పూర్ స్థానిక మీడియాతో మాట్లాడుతూ.. ఈ విక్రయాల ద్వారా వచ్చే ఆదాయాన్ని యుద్ధంలో ప్రాణాలు కోల్పోయిన ఇరాన్ పౌరులు, అమరవీరుల కుటుంబాలకు ఆర్థిక పరిహారంగా అందజేస్తామని స్పష్టం చేశారు. అయితే ఇప్పటివరకు ఇరాన్ భద్రతా బలగాలు ఎన్ని నౌకలను, ఎంత విలువైన సరుకును అదుపులోకి తీసుకున్నాయనే పూర్తి వివరాలను మాత్రం ఆయన బహిర్గతం చేయలేదు. కొనసాగుతున్న ఉద్రిక్తతల నడుమ ఇరాన్ ఈ విధంగా ‘లిక్విడేషన్ సేల్’ పేరిట విదేశీ నౌకలను విక్రయించడానికి సిద్ధపడటం అంతర్జాతీయ స్థాయిలో తీవ్ర చర్చనీయాంశంగా మారింది.
