జన గళం తెలంగాణ డెస్క్: ఖమ్మం, వరంగల్, నల్గొండ జిల్లాల ఉమ్మడి పట్టభద్రుల శాసనమండలి ఎన్నికల బరిలో నిలిచేందుకు జనసేన పార్టీ సమాయత్తమవుతోంది. ఈ ఎన్నికల కార్యాచరణ, సన్నద్ధతపై హైదరాబాద్లోని జనసేన పార్టీ తెలంగాణ రాష్ట్ర ప్రధాన కార్యాలయంలో సోమవారం కీలక సన్నాహక సమావేశం నిర్వహించారు. పార్టీ తరఫున పట్టభద్రుల నియోజకవర్గ అభ్యర్థిగా పోటీ చేయనున్న డాక్టర్ గడల శ్రీనివాసరావు సారథ్యంలో ఈ సమావేశం సాగింది. ఎన్నికల ప్రచార వ్యూహాలు, క్షేత్రస్థాయిలో ఓటర్ల నమోదు, పట్టభద్రుల సమస్యలను ఎన్నికల వేదికగా ప్రస్తావించే అంశాలపై నేతలు లోతుగా చర్చించారు.
ఈ సన్నాహక సమావేశంలో జనసేన పార్టీ రాష్ట్ర ప్రధాన కార్యదర్శి తాళ్లూరి రామ్, తెలంగాణ రాష్ట్ర వ్యవహారాల పర్యవేక్షకులు నేమూరి శంకర్ గౌడ్, ప్రచార కార్యదర్శి సాగర్ ఆర్.కె. నాయుడు పాల్గొని దిశానిర్దేశం చేశారు. మూడు ఉమ్మడి జిల్లాల పరిధిలోని పట్టభద్రులు, నిరుద్యోగ యువత, ఉద్యోగుల సమస్యల పరిష్కారానికి జనసేన పార్టీ నిరంతరం పోరాడుతుందని స్పష్టం చేశారు. పార్టీ అధినేత పవన్ కళ్యాణ్ ఆశయాలకు అనుగుణంగా ప్రతి విద్యావంతుడి వద్దకు పార్టీ సిద్ధాంతాలను బలంగా తీసుకెళ్లి ఎన్నికల్లో విజయం సాధించేలా సమష్టిగా పనిచేయాలని నిర్ణయించారు.
ఈ కీలక భేటీలో పార్టీ ప్రముఖ నాయకులు రాజలింగం, మచ్చ సుధాకర్, ముమ్మరెడ్డి ప్రేమ్ కుమార్, ప్రజీత్ గౌడ్, సంపత్ నాయక్, శిరీష, కావ్య, నిహారిక, హైందవి రెడ్డి, మేడ రామకృష్ణ, మంథని సంపత్, సురేష్ రెడ్డి, ప్రేమ్ గాంధీ, లక్ష్మణ్ గౌడ్ సహా వివిధ విభాగాల ప్రతినిధులు, కార్యకర్తలు పెద్ద సంఖ్యలో పాల్గొన్నారు. క్షేత్రస్థాయి కమిటీలను వేగవంతం చేసి నియోజకవర్గవ్యాప్తంగా విస్తృత పర్యటనలు చేపట్టేందుకు కార్యచరణ సిద్ధం చేశారు.