జన గళం ఆంధ్రప్రదేశ్ డెస్క్: నెల్లూరు నగరంలోని గ్రాండ్ మినర్వా హోటల్ వేదికగా కూటమి రాజకీయాల్లో అత్యంత ఆసక్తికర పరిణామం చోటుచేసుకుంది. జనసేన పార్టీ రాష్ట్ర ప్రధాన కార్యదర్శి, ఆంధ్రప్రదేశ్ ఎంఎస్ఎంఈ (MSME) డెవలప్‌మెంట్ కార్పొరేషన్ చైర్మన్ శ్రీ తమ్మిరెడ్డి శివశంకర్ గారిని ఆంధ్రప్రదేశ్ రాష్ట్ర పురపాలక, పట్టణాభివృద్ధి శాఖ మంత్రివర్యులు శ్రీ పొంగూరు నారాయణ గారు మర్యాదపూర్వకంగా కలుసుకున్నారు. హోటల్‌కు విచ్చేసిన మంత్రి నారాయణ గారికి తమ్మిరెడ్డి శివశంకర్ సాదరంగా స్వాగతం పలికి ఆత్మీయ ఆతిథ్యం అందించారు.
అనంతరం వీరిరువురి మధ్య సుదీర్ఘంగా సాగిన ఈ భేటీలో ప్రధానంగా రాబోయే స్థానిక సంస్థల ఎన్నికల సన్నద్ధత, వ్యూహాలపై విస్తృతంగా చర్చించారు. నెల్లూరు మున్సిపల్ కార్పొరేషన్‌తో పాటు ఉమ్మడి నెల్లూరు జిల్లా పరిధిలోని పురపాలక సంఘాలు, గ్రామీణ స్థానిక సంస్థల్లో టీడీపీ-జనసేన-బీజేపీ కూటమి అభ్యర్థుల సమన్వయం, సీట్ల సర్దుబాటుపై ప్రాథమిక సమాలోచనలు జరిపారు. కూటమి భాగస్వామ్య పక్షాల మధ్య సమన్వయం పటిష్టంగా ఉంటూ, ప్రతి డివిజన్ మరియు వార్డులో క్షేత్రస్థాయి శ్రేణులు ఏకతాటిపై నడిచేలా కార్యాచరణ రూపొందించాలని నిర్ణయించారు. స్థానిక సంస్థల ఎన్నికల్లో కూటమి అభ్యర్థుల ఘన విజయానికి పక్కా ప్రణాళికతో ముందుకు వెళ్లాలని నేతలిద్దరూ ఒక అవగాహనకు వచ్చారు.
