జన గళం ఆంధ్రప్రదేశ్ డెస్క్: మన విశిష్ట వారసత్వాన్ని కాపాడుకుంటూ యువతకు ఉపాధి అవకాశాలు కల్పించడంలో పర్యాటక రంగం అత్యంత కీలక పాత్ర పోషిస్తుందని విజయవాడ పశ్చిమ నియోజకవర్గ శాసనసభ్యులు శ్రీ సుజనా చౌదరి గారు పేర్కొన్నారు. ప్రపంచ పర్యాటక దినోత్సవం (వరల్డ్ టూరిజం డే) సందర్భంగా ఆయన ప్రజలకు, పర్యాటకులకు హృదయపూర్వక శుభాకాంక్షలు తెలియజేశారు.
ఈ సందర్భంగా సుజనా చౌదరి మాట్లాడుతూ.. పర్యాటకం అనేది కేవలం విహారయాత్ర మాత్రమే కాదని, అది విభిన్న సంస్కృతులను అనుసంధానిస్తూ ఆర్థికాభివృద్ధికి చోదకంగా నిలుస్తుందని స్పష్టం చేశారు. చారిత్రక కట్టడాలు, ఆలయాలు, ప్రకృతి రమణీయ ప్రదేశాలు మన దేశ వైభవానికి ప్రతీకలని తెలిపారు. మన సంస్కృతి, సంప్రదాయాలు మరియు సాంస్కృతిక వారసత్వాన్ని భావితరాలకు అందిస్తూనే, పర్యాటక రంగం ద్వారా స్థానిక యువతకు విస్తృత స్థాయిలో ఉపాధి మరియు వ్యాపార అవకాశాలను సృష్టించాల్సిన అవసరం ఉందని ఆయన పిలుపునిచ్చారు. ఆంధ్రప్రదేశ్ రాష్ట్రంలో పర్యాటక రంగాన్ని అంతర్జాతీయ స్థాయి ప్రమాణాలతో తీర్చిదిద్దేందుకు కూటమి ప్రభుత్వం విశేష కృషి చేస్తోందని పేర్కొన్నారు.
