జన గళం నూజివీడు బ్యూరో: నూజివీడు పట్టణ స్థానిక సమరంలో జనసేన పార్టీ తరపున యువ నాయకత్వానికి కీలక అవకాశం దక్కింది. త్వరలో జరగనున్న నూజివీడు మున్సిపల్ ఎన్నికల్లో జనసేన పార్టీ అభ్యర్థిగా కౌన్సిలర్‌గా పోటీ చేసే అరుదైన అవకాశాన్ని కూటమి పెద్దలు, రాష్ట్ర సమాచార పౌర సంబంధాలు, గృహ నిర్మాణ శాఖ మంత్రివర్యులు శ్రీ కొలుసు పార్థసారథి తనకు కల్పించారని జనసేన నేత ముత్యాల కామేష్ అధికారికంగా ప్రకటించారు. ఈ సందర్భంగా మంత్రి పార్థసారథికి, కూటమి నాయకత్వానికి ఆయన హృదయపూర్వక కృతజ్ఞతలు తెలిపారు.
చిరంజీవి గారి అభిమానిగా రాజకీయాల్లోకి అడుగుపెట్టి, డిప్యూటీ సీఎం పవన్ కల్యాణ్ గారి ఆశయాల సాధన కోసం జనసేన పార్టీలో కొనసాగుతున్న తనకు ప్రజలకు సేవ చేసే అవకాశం రావడం గర్వకారణమని కామేష్ పేర్కొన్నారు. ఈ ఎన్నికల్లో తనను ఆశీర్వదించి గెలిపిస్తే ఐదేళ్లలో తన వార్డును నూజివీడు పట్టణంలోనే నంబర్ వన్ మోడల్ వార్డుగా తీర్చిదిద్దుతానని హామీ ఇచ్చారు. ప్రజాప్రతినిధిగా తనకు వచ్చే గౌరవ వేతనాన్ని సైతం వార్డులోని పేద ప్రజల సంక్షేమానికి వెచ్చిస్తానని, అభివృద్ధి నిధుల్లో నయాపైసా అవినీతికి తావులేకుండా అత్యంత పారదర్శకంగా, నీతి నిజాయితీలతో పనిచేస్తానని స్పష్టం చేశారు. వార్డు సర్వతోముఖాభివృద్ధికి ప్రజలు, యువత, అభిమానులు సంపూర్ణ మద్దతు ఇవ్వాలని విజ్ఞప్తి చేశారు.
