రచన: జన గళం తిరుపతి డెస్క్: ఎన్నికల సమయంలో ప్రజలకు అమలుకు సాధ్యంకాని హామీలను గుప్పించి అధికారాన్ని చేజిక్కించుకున్న ముఖ్యమంత్రి నారా చంద్రబాబు నాయుడు, గెలిచిన తర్వాత వాటిని తుంగలో తొక్కి ప్రజలను నయవంచన చేశారని మాజీ మంత్రి, పుంగనూరు ఎమ్మెల్యే పెద్దిరెడ్డి రామచంద్రారెడ్డి తీవ్రస్థాయిలో మండిపడ్డారు. శుక్రవారం ఆయన మీడియాతో మాట్లాడుతూ కూటమి ప్రభుత్వం అనుసరిస్తున్న తీరుపై తీవ్ర ఆగ్రహం వ్యక్తం చేశారు.
”ఓట్లు వేయించుకోవడానికి ముందు ఒకలా, గెలిచిన తర్వాత మరోలా వ్యవహరించడం చంద్రబాబుకు అలవాటేనని.. ‘ఓట్లు వేయకముందు ఓడ మల్లన్న.. ఎన్నికలయ్యాక బోడి మల్లన్న’ అన్నట్లుగా ఆయన ప్రవర్తిస్తున్నారు” అంటూ పెద్దిరెడ్డి ఘాటుగా విమర్శించారు. ఎన్నికల వేళ ప్రజలను ఆకర్షించేందుకు ఇష్టారీతిన ఇచ్చిన హామీలను ఇప్పుడు ఏమాత్రం పట్టించుకోకుండా కాలయాపన చేస్తున్నారని దుయ్యబట్టారు. గత వైఎస్సార్‌సీపీ పాలనలో వైఎస్ జగన్ మోహన్ రెడ్డి ఇచ్చిన ప్రతీ హామీని త్రికరణశుద్ధిగా అమలు చేసి చూపించారని గుర్తుచేశారు. ప్రజలను నిరంతరం మోసం చేయలేరని, కూటమి ప్రభుత్వ మోసపూరిత వైఖరిని ప్రజలు క్షుణ్ణంగా గమనిస్తున్నారని, త్వరలోనే చంద్రబాబుకు తగిన గుణపాఠం చెబుతారని పెద్దిరెడ్డి హెచ్చరించారు.
