ముంబై, 2026 సెప్టెంబర్ 20, (జనగళం డెస్క్):
ప్రాథమిక మార్కెట్లో ఎస్ఎంఈ ఐపీవోల సందడి నిరంతరం కొనసాగుతోంది. తాజాగా డిజిటల్ మార్కెటింగ్, బ్రాండ్ స్ట్రాటజీ సేవల రంగంలో కార్యకలాపాలు సాగిస్తున్న ‘లిక్విడ్ డిజిటల్ ఇండియా లిమిటెడ్’ పబ్లిక్ ఇష్యూకు సిద్ధమైంది. ఈ సంస్థ ప్రారంభ పబ్లిక్ ఆఫర్ (IPO) సెప్టెంబర్ 23న ప్రారంభమై, సెప్టెంబర్ 25న ముగియనుందని కంపెనీ అధికారికంగా వెల్లడించింది.
వివరాలు ఇలా ఉన్నాయి, కంపెనీ విడుదల చేసిన ప్రాస్పెక్టస్ ప్రకారం.. ఒక్కో ఈక్విటీ షేరు ముఖ విలువ రూ. 10 కాగా, షేరు ప్రైస్ బ్యాండ్ను రూ. 51 నుంచి రూ. 54గా నిర్ధారించారు. కనీస బిడ్డింగ్ లాట్ సైజు వివరాలు త్వరలోనే అధికారికంగా వెలువడనున్నాయి. ఈ పబ్లిక్ ఇష్యూ ద్వారా సేకరించిన పెట్టుబడులను సాంకేతిక మౌలిక వసతుల పెంపునకు, అంతర్జాతీయ మార్కెట్లలో క్లయింట్ నెట్వర్క్ విస్తరణకు, వర్కింగ్ క్యాపిటల్ అవసరాలకు మరియు సాధారణ కార్పొరేట్ ప్రయోజనాల కోసం వినియోగించనున్నట్లు కంపెనీ వర్గాలు తెలిపాయి.
వృద్ధి పథంలో డిజిటల్ రంగం:
గడచిన కొద్దికాలంగా దేశీయంగా డిజిటల్ కంటెంట్, సోషల్ మీడియా మార్కెటింగ్ మరియు బ్రాండింగ్ రంగాలకు కార్పొరేట్ రంగం నుంచి విపరీతమైన డిమాండ్ ఏర్పడింది. సమర్థవంతమైన క్లయింట్ పోర్ట్ఫోలియోతో మంచి లాభాలను ఆర్జిస్తున్న లిక్విడ్ డిజిటల్ ఇండియా లిస్టింగ్ తర్వాత మరింత వేగంగా విస్తరించే ప్రణాళికతో ముందడుగు వేస్తోంది. ఈ ఐపీవో ఎన్ఎస్ఈ ఎమర్జ్ (NSE Emerge) ప్లాట్ఫామ్పై లిస్ట్ కానుంది. ఎస్ఎంఈ సెగ్మెంట్లో మంచి రాబడులను ఆశించే రిటైల్ ఇన్వెస్టర్లు, హెచ్ఎన్ఐలు ఈ ఐపీవో వైపు దృష్టి సారిస్తున్నారు.