విజయవాడ తూర్పు నియోజకవర్గ జనసేన సమన్వయకర్తగా శ్రీమతి రావి సౌజన్య నియామకం: హృదయపూర్వక అభినందనలు తెలిపిన ఇల్లూరి సుగుణ బాబు!

జన గళం విజయవాడ బ్యూరో: ఆంధ్రప్రదేశ్ రాష్ట్రంలో స్థానిక సంస్థల ఎన్నికల సమరానికి జనసేన పార్టీ సమాయత్తమవుతున్న క్రమంలో పార్టీ నాయకత్వం కీలక నిర్ణయాలు తీసుకుంటోంది. క్షేత్రస్థాయి నుంచి వాస్తవ రాజకీయ సమాచారాన్ని సేకరించి విజయవాడ పార్లమెంట్ కో-ఆర్డినేషన్ కమిటీకి ఎప్పటికప్పుడు నివేదించేందుకు గాను, జనసేన పార్టీ అధ్యక్షులు, రాష్ట్ర గౌరవ ఉప ముఖ్యమంత్రి శ్రీ కొణిదల పవన్ కళ్యాణ్ గారి ఆదేశాల మేరకు విజయవాడ తూర్పు అసెంబ్లీ నియోజకవర్గ స్థానిక ఎన్నికల కో-ఆర్డినేషన్ కమిటీని అధికారికంగా ప్రకటించారు. ఈ కమిటీలో అసెంబ్లీ సమన్వయకర్తగా శ్రీమతి రావి సౌజన్య నియమితులయ్యారు. మహిళా సాధికారతకు ప్రాధాన్యతనిస్తూ, పార్టీ పట్ల నిబద్ధతతో పనిచేస్తున్న మహిళా నాయకురాలికి ఈ కీలక బాధ్యతలను అప్పగించడం పట్ల నియోజకవర్గంలో హర్షాతిరేకాలు వ్యక్తమవుతున్నాయి. ఈ సందర్భంగా స్థానిక నాయకులు శ్రీ ఇల్లూరి సుగుణ బాబు ఆమెకు పుష్పగుచ్ఛం సమర్పించి హృదయపూర్వక అభినందనలు తెలియజేశారు. రాబోయే స్థానిక ఎన్నికల్లో విజయవాడ తూర్పు నియోజకవర్గ పరిధిలో కూటమి అభ్యర్థుల విజయమే లక్ష్యంగా పార్టీ శ్రేణులు, వీరమహిళలను సమన్వయం చేస్తూ ముందుకు సాగుతామని నాయకులు స్పష్టం చేశారు.