జన గళం ప్రత్యేక డెస్క్: సమాజ సేవలో తనదైన ముద్ర వేస్తూ, పేద విద్యార్థుల అభ్యున్నతికి నిరంతరం కృషి చేస్తున్న సంగారెడ్డి జిల్లా విశ్రాంత విద్యాధికారి డి. అంజయ్య మరోసారి తన ఉదారతను చాటుకున్నారు. హైదరాబాద్లోని చిరంజీవి నేత్ర మరియు రక్తనిధి కేంద్రంలో (Chiranjeevi Eye & Blood Centre) ఆయన 50వ సారి స్వచ్ఛందంగా రక్తదానం చేశారు. ఒకవైపు విద్యా రంగంలో విశేష సేవలందిస్తూ, మరోవైపు ఆపదలో ఉన్న ప్రాణాలను కాపాడేందుకు అర్థశతకం సార్లు రక్తదానం చేసిన ఆయన స్ఫూర్తిదాయక సేవలను చిరంజీవి చారిటబుల్ ట్రస్ట్ ప్రతినిధులు ఘనంగా కొనియాడారు.
ఉత్తమ విద్యాధికారిగా రాష్ట్ర ప్రభుత్వం నుంచి పలుమార్లు ప్రతిష్టాత్మక అవార్డులు అందుకున్న అంజయ్య, పేద పిల్లలకు ఉచిత విద్యాబోధన చేస్తూ వారి జీవితాల్లో అక్షర కాంతులు నింపుతున్నారు. 50వ సారి రక్తదానం పూర్తి చేసుకున్న సందర్భంగా మెగాస్టార్ చిరంజీవి తరపున చిరంజీవి ఐ & బ్లడ్ సెంటర్ ముఖ్య నిర్వహణాధికారి రావణం స్వామి నాయుడు ఆయనకు హృదయపూర్వక ధన్యవాదాలు మరియు కృతజ్ఞతలు తెలియజేశారు. నిరంతర ప్రజాసేవలో తరిస్తున్న అంజయ్య ఆయురారోగ్యాలతో వర్ధిల్లాలని, ఆయన సేవలు సమాజానికి మరింతగా అందాలని ఆకాంక్షించారు.
