రచన: TVR విఠల్, జన గళం తిరుపతి డెస్క్: ప్రముఖ ఆధ్యాత్మిక గురువు, ‘ఏకం’ (వన్నెస్) సంస్థల వ్యవస్థాపకులు విజయ్ కుమార్ నాయుడు అలియాస్ ‘కల్కి భగవాన్’ (77) కన్నుమూశారు. గత కొంతకాలంగా అనారోగ్య సమస్యలతో బాధపడుతున్న ఆయన, చెన్నైలోని ఓ ప్రైవేట్ ఆసుపత్రిలో చికిత్స పొందుతూ మంగళవారం తుదిశ్వాస విడిచారు. ఆయన మృతితో దేశ, విదేశాల్లోని లక్షలాది మంది భక్తులు, శిష్యులు తీవ్ర దిగ్భ్రాంతికి గురయ్యారు. తిరుపతి జిల్లా వరదయ్యపాళెం కేంద్రంగా ప్రపంచవ్యాప్తంగా ఆధ్యాత్మిక సామ్రాజ్యాన్ని విస్తరించిన ఆయన ప్రస్థానం ఆధ్యాత్మిక బోధనలు, వినూత్న సేవలతో పాటు వివాదాలు, ఐటీ దాడుల సమాహారంగా నిలిచింది.
1949 మార్చి 7న తమిళనాడులోని గుడియత్తంలో జన్మించిన విజయ్ కుమార్ నాయుడు, చెన్నై డి.జి. వైష్ణవ్ కాలేజీలో డిగ్రీ పూర్తి చేసి ప్రారంభంలో లైఫ్ ఇన్సూరెన్స్ కార్పొరేషన్ (LIC)లో క్లర్క్గా పనిచేశారు. 1980వ దశకంలో ఉద్యోగాన్ని వీడి చిత్తూరు జిల్లా కుప్పం సమీపంలో ‘జీవాశ్రమం’ పాఠశాలను నెలకొల్పారు. 1989లో తనను తాను విష్ణుమూర్తి పదవ అవతారమైన ‘కల్కి’గా ప్రకటించుకోవడంతో ఆయన జీవితం అనూహ్య మలుపు తిరిగింది. ఆయన సతీమణి పద్మావతిని భక్తులు ‘అమ్మ భగవాన్’గా కొలిచారు. వరదయ్యపాళెం వద్ద ఆంధ్రప్రదేశ్ – తమిళనాడు సరిహద్దుల్లో వందలాది ఎకరాల్లో ‘ఏకత్వ క్షేత్రం’ (ఆన్నెస్ యూనివర్సిటీ – గోల్డెన్ సిటీ) పేరిట పాలరాతితో నిర్మించిన మహా క్షేత్రం అంతర్జాతీయ ఆధ్యాత్మిక కేంద్రంగా విలసిల్లింది.
ఆయన ట్రస్ట్ల ద్వారా చిత్తూరు, తిరుపతి జిల్లాల్లోని వందలాది గ్రామాల్లో ఉచిత తాగునీటి శుద్ధి ప్లాంట్లు, ఉచిత వైద్య శిబిరాలు, గ్రామీణ పేద విద్యార్థులకు విద్య వంటి ఎన్నో సామాజిక సేవా కార్యక్రమాలు జరిగాయి. ‘ముక్తి దీక్ష’, ‘ఆన్నెస్ మెడిటేషన్’ విదేశీయులను సైతం విశేషంగా ఆకర్షించాయి. అయితే, కీర్తితో పాటే వివాదాలూ చుట్టుముట్టాయి. వరదయ్యపాళెం పరిసరాల్లో రైతుల నుంచి భూముల ఆక్రమణ ఆరోపణలు, దర్శనాలు-దీక్షల పేరిట అధిక వసూళ్ల విమర్శలు, 2008లో జరిగిన తొక్కిసలాట ఘటన ఆయనను వివాదాల్లోకి నెట్టాయి. ముఖ్యంగా 2019 అక్టోబర్లో కల్కి ఆశ్రమాలు, ఆయన కుమారుడు కృష్ణకు చెందిన సంస్థలపై ఏకకాలంలో జరిగిన ఐటీ దాడుల్లో రూ.44 కోట్ల కరెన్సీ, రూ.20 కోట్ల విదేశీ మారకం, 90 కిలోల బంగారం, రూ.500 కోట్లకు పైగా లెక్కల్లో చూపని ఆస్తులు బయటపడటం సంచలనం సృష్టించింది. ఒక సామాన్య గుమస్తా స్థాయి నుంచి అంతర్జాతీయ గురువుగా ఎదిగి, వేల కోట్ల సామ్రాజ్యాన్ని స్థాపించిన కల్కి భగవాన్ ప్రస్థానం ఆయన మరణంతో ముగిసింది.
Slug: spiritual-guru-kalki-bhagavan-passes-away-chennai-hospital-lic-clerk-to-global-guru