జన గళం ఆంధ్రప్రదేశ్ డెస్క్: కాకినాడ జిల్లా రాజకీయాల్లో కీలక పరిణామం చోటుచేసుకుంది. జిల్లా సీనియర్ నాయకులు శ్రీ యనమల కృష్ణుడు జనసేన పార్టీ తీర్థం పుచ్చుకుని, జనసేన కుటుంబంలో భాగస్వామ్యం అయ్యారు. ఈ సందర్భంగా ఆయనకు జనసేన పార్టీ రాష్ట్ర సంయుక్త కార్యదర్శి, ప్రత్తిపాడు నియోజకవర్గ జనసేన సమన్వయకర్త శ్రీ మేడిశెట్టి సూర్యకిరణ్ (బాబి) హృదయపూర్వక కృతజ్ఞతలు, సాదర స్వాగతం తెలియజేశారు.
ఉప ముఖ్యమంత్రి, జనసేన అధినేత శ్రీ పవన్ కళ్యాణ్ గారి నాయకత్వం, పార్టీ సిద్ధాంతాలపై నమ్మకంతో యనమల కృష్ణుడు గారు జనసేనలో చేరడం కాకినాడ జిల్లాతో పాటు ప్రత్తిపాడు నియోజకవర్గంలోనూ పార్టీ శ్రేణులకు సరికొత్త ఉత్సాహాన్ని, మరింత రాజకీయ బలాన్ని చేకూరుస్తుందని మేడిశెట్టి సూర్యకిరణ్ పేర్కొన్నారు. సీనియర్ నాయకుల అనుభవం, క్షేత్రస్థాయి కార్యకర్తల పోరాటపటిమ తోడై పార్టీ సంస్థాగతంగా మరింత పటిష్టమవుతుందని ఆశాభావం వ్యక్తం చేశారు. రాబోయే రోజుల్లో ప్రజా సమస్యల పరిష్కారానికి, కూటమి ప్రభుత్వ సంక్షేమ, అభివృద్ధి ఫలాలు ప్రజలకు చేరవేసేందుకు సమిష్టిగా పనిచేస్తామని స్పష్టం చేశారు.
