జన గళం క్రైమ్ డెస్క్: ప్రభుత్వ హోంగార్డు ఉద్యోగాలు ఇప్పిస్తామని నమ్మించి అమాయకుల నుంచి లక్షల రూపాయలు వసూలు చేయడమే కాకుండా నకిలీ అపాయింట్‌మెంట్ లెటర్లు అందజేసిన మోసగాడిని తిరుపతి జిల్లా అలిపిరి పోలీసులు అరెస్ట్ చేశారు. జిల్లా ఎస్పీ ఎల్. సుబ్బరాయుడు ఆదేశాల మేరకు చేపట్టిన ఈ దర్యాప్తులో సంచలన విషయాలు వెలుగులోకి వచ్చాయి. నెల్లూరు జిల్లా చేజర్ల మండలం మడపల్లి గ్రామానికి చెందిన గుండుబోయన నరేష్ తాను నెల్లూరు జిల్లా పోలీస్ కార్యాలయంలో హోంగార్డుగా పనిచేస్తున్నానని నమ్మబలికి ఈ దారుణానికి పాల్పడ్డాడు.
నిందితుడు నరేష్ డి. లోకేష్ మరియు ఎన్. సత్తి అనే ఇద్దరు బాధితులకు హోంగార్డు ఉద్యోగాలు ఇప్పిస్తానని చెప్పి వారి నుంచి బ్యాంకు ఖాతాల ద్వారా మొత్తం ఆరు లక్షల తొంభై ఐదు వేల రూపాయలను వసూలు చేశాడు. అనంతరం వారికి నకిలీ అపాయింట్‌మెంట్ లెటర్లను అందజేశాడు. మోసపోయామని గ్రహించిన బాధితుడు లోకేష్ అక్టోబర్ రెండవ తేదీన అలిపిరి పోలీస్ స్టేషన్‌లో ఫిర్యాదు చేయడంతో కేసు నమోదైంది. పోలీసుల విచారణలో నిందితుడు నరేష్ గత సుమారు ఒక సంవత్సరం కాలంగా నెల్లూరు హోంగార్డ్ యూనిట్‌లో విధులకు గైర్హాజరుగా ఉన్నట్లు తేలింది. సోమవారం ఉదయం ఎస్వీఆర్‌ఆర్‌జీజీ హాస్పిటల్ జంక్షన్ వద్ద నిందితుడిని అదుపులోకి తీసుకుని అరెస్ట్ చేసినట్లు పోలీసులు తెలిపారు.
నిందితుడిపై గతంలోనూ పలు పోలీస్ స్టేషన్లలో ఉద్యోగాల పేరుతో డబ్బులు వసూలు చేసిన కేసులు ఉన్నట్లు తేలింది. మంగళగిరి రూరల్ పోలీస్ స్టేషన్ పరిధిలో ఏడు లక్షలు వసూలు చేయగా ఆ మొత్తాన్ని వెనక్కి ఇచ్చినట్లు, బుచ్చిరెడ్డిపాలెం పోలీస్ స్టేషన్‌లో పదిహేడు లక్షల యాభై వేల రూపాయల వసూలు కేసు కోర్టు విచారణలో ఉన్నట్లు వెల్లడించారు. ఈ సందర్భంగా ఎస్పీ స్పందిస్తూ ప్రభుత్వ ఉద్యోగాలు ఇప్పిస్తామని మోసం చేసే మధ్యవర్తులను నమ్మి డబ్బులు చెల్లించవద్దని, ఇలాంటి మోసాలపై సమాచారం ఉంటే వెంటనే డయల్ 112 లేదా స్థానిక పోలీసులకు తెలపాలని ప్రజలను కోరారు.
Slug: tirupati-home-guard-job-scam-arrest-naresh