జన గళం ఆంధ్రప్రదేశ్ డెస్క్: వెల్వడం గ్రామంలో అక్రమ వెంచర్లకు వ్యతిరేకంగా అధికారులకు ఫిర్యాదు చేసిన స్థానికులు మరియు పార్టీ కార్యకర్తలపై కొందరు స్థానిక నాయకులు కక్షసాధింపు చర్యలకు పాల్పడుతున్నారన్న ఆరోపణలు తీవ్ర కలకలం రేపుతున్నాయి. వెల్వడం గ్రామంలోని భాస్కర్ నగర్ కాలనీ ఎదురుగా ఉన్న పంట పొలాలలో నిబంధనలకు విరుద్ధంగా అక్రమ వెంచర్లు వేశారంటూ గ్రామస్తుల సంతకాలతో స్థానికుడు ప్రత్తిపాటి ప్రభాకర్ అధికారులకు ఫిర్యాదు చేశారు. అయితే ఈ ఫిర్యాదులో సంతకాలు చేశారన్న ఒక్క కారణంతోనే కొందరు స్థానిక నాయకులు, పదవులలో ఉన్న నేతలు సామాన్య కార్యకర్తలను తీవ్ర ఇబ్బందులకు గురిచేస్తున్నారని ప్రభాకర్ బహిరంగంగా ఆవేదన వ్యక్తం చేశారు. గమనించదగ్గ విషయం ఏమిటంటే, సరిగ్గా ఏడాది క్రితం ఇదే అక్రమ వెంచర్ల గురించి అప్పట్లో సదరు నాయకులే స్వయంగా ఎంపీడీవోకు ఫిర్యాదు చేసినట్లు ఆయన గుర్తుచేశారు.
ఫిర్యాదులో సంతకాలు పెట్టారన్న దురుద్దేశంతోనే స్థానిక నేతలు ప్రతీకార చర్యలకు దిగుతున్నారని ప్రత్తిపాటి ప్రభాకర్ తీవ్రంగా ఆరోపించారు. గ్రామంలో అనేక బెల్ట్ షాపులు నడుస్తున్నప్పటికీ, కేవలం ఫిర్యాదుపై సంతకం చేశాడన్న కక్షతో ఒక టీడీపీ కార్యకర్తకు చెందిన బెల్ట్ షాపుపై ఎక్సైజ్ శాఖ అధికారులతో దాడి చేయించి దాన్ని బలవంతంగా మూయించారని మండిపడ్డారు. అంతేకాకుండా, భాస్కర్ నగర్ కాలనీలో చెరువుకట్ట పక్కన నివాసం ఉంటున్న వారు కూడా ఈ ఫిర్యాదులో సంతకాలు చేశారనే కోపంతో వారి ఇళ్లకు నోటీసులు పంపి కూల్చివేస్తామంటూ బెదిరింపులకు పాల్పడుతున్నారని ఆగ్రహం వ్యక్తం చేశారు. పేదలకు ఇళ్ల స్థలాలు ఇచ్చి ఆదుకుంటున్న కూటమి ప్రభుత్వ ఆశయాలకు విరుద్ధంగా, ఇలా ఇళ్లు కూలుస్తామని బెదిరించడం ఎంతవరకు సమంజసమని ఆయన ప్రశ్నించారు. ఎస్సీలు ఎక్కువగా సంతకాలు చేస్తే వ్యతిరేకత వస్తుందనే ఉద్దేశంతో సామాన్య బీసీ, వడ్డెర వర్గాలకు చెందిన వారిని టార్గెట్ చేసి వేధిస్తున్నారని ధ్వజమెత్తారు.
అక్రమ వెంచర్ల నిర్వాహకులపై అంత ప్రేమ ఉంటే, ముందుగా ఆ వెంచర్‌కు సంబంధించిన ప్రభుత్వ అనుమతులు ఏంటో చూపించాలని ప్రత్తిపాటి ప్రభాకర్ సవాల్ విసిరారు. అంతేకానీ, ప్రజా ప్రయోజనాల కోసం సంతకాలు చేసిన సామాన్య కార్యకర్తలను ఇళ్లకి పిలిచి ఇబ్బంది పెట్టడం, “మీకు ఆ చెరువు కింద ఎన్ని ఎకరాల పొలం ఉంది?” అంటూ ప్రశ్నించడం సరికాదని హితవు పలికారు. అక్రమ వెంచర్లపై అధికారులకు ఫిర్యాదు చేసింది తాను (ప్రత్తిపాటి ప్రభాకర్) అని, ఏమైనా ఉంటే తనను నేరుగా నిలదీయాలని స్పష్టం చేశారు. ముందు ముందు కూడా ఇలాంటి అక్రమాలపై మరింత గట్టిగా ఫిర్యాదులు చేస్తామని, సామాన్య కార్యకర్తలను, ప్రజలను ఇబ్బంది పెడితే చూస్తూ ఊరుకోబోమని ఆయన హెచ్చరించారు.
Slug: velvadlam-illegal-ventures-complaint-pratthipati-prabhakar-warning