జన గళం ఆంధ్రప్రదేశ్ డెస్క్: కృష్ణా జిల్లా కృత్తివెన్ను మండల పరిధిలో అక్రమ మట్టి రవాణా యథేచ్ఛగా సాగుతోంది. మైనింగ్, రెవెన్యూ నిబంధనలను తుంగలో తొక్కి ఎలాంటి ముందస్తు అనుమతులు లేకుండానే కొందరు వ్యాపారులు నిత్యం భారీ ఎత్తున మట్టిని తవ్వుతూ ఇతర ప్రాంతాలకు తరలిస్తున్నారు. పగలు, రాత్రి తేడా లేకుండా వందలాది టిప్పర్లు, ట్రాక్టర్లలో మట్టిని రవాణా చేస్తుండటంతో స్థానిక రహదారులు తీవ్రంగా దెబ్బతినడమే కాకుండా గ్రామీణ ప్రజలు తీవ్ర అసౌకర్యానికి గురవుతున్నారు.
కళ్లముందే అక్రమ రవాణా జరుగుతున్నా సంబంధిత అధికార యంత్రాంగం చూసీచూడనట్లు వ్యవహరిస్తోందన్న ఆరోపణలు వెల్లువెత్తుతున్నాయి. గ్రామస్తులు, స్థానిక ప్రజలు అధికారుల దృష్టికి సమస్యను తీసుకెళ్లినా, స్పష్టమైన సమాచారం ఉన్నప్పటికీ ఎలాంటి తనిఖీలు చేపట్టకపోవడంపై తీవ్ర అనుమానాలు వ్యక్తమవుతున్నాయి. నిబంధనలను అతిక్రమిస్తున్న వాహనాలను అడ్డుకోవడంలో క్షేత్రస్థాయి సిబ్బంది ఎందుకు మీనమేషాలు లెక్కిస్తున్నారనే ప్రశ్నలు సర్వత్రా వినిపిస్తున్నాయి.
ఈ అక్రమ రవాణా వెనుక స్థానిక రాజకీయ నేతల అండదండలు ఉండటం వల్లే అధికారులు చర్యలు చేపట్టడానికి వెనుకడుగు వేస్తున్నారనే ప్రచారం జోరుగా సాగుతోంది. రాజకీయ నాయకుల నుంచి వస్తున్న తీవ్రమైన ఒత్తిళ్ల కారణంగానే ఉన్నతాధికారులు సైతం మిన్నకుండిపోతున్నారా అనే భావన ప్రజల్లో వ్యక్తమవుతోంది. ఇప్పటికైనా జిల్లా కలెక్టర్ మరియు ఉన్నత స్థాయి పోలీసు యంత్రాంగం రంగంలోకి దిగి, కృత్తివెన్ను పరిసరాల్లో జరుగుతున్న అక్రమ మట్టి తవ్వకాలపై సమగ్ర విచారణ జరిపి బాధ్యులపై కఠిన చర్యలు తీసుకోవాలని స్థానికులు కోరుతున్నారు.