జన గళం తెలంగాణ డెస్క్: తెలంగాణ రాష్ట్రంలో పార్టీని క్షేత్రస్థాయి నుంచి మరింత విస్తృతంగా బలోపేతం చేసే దిశగా జనసేన పార్టీ అధిష్టానం కీలక నిర్ణయం తీసుకుంది. ఇతర పార్టీల నుంచి వచ్చే సీనియర్ నాయకులు, ప్రజాప్రతినిధులు, వివిధ రంగాల ప్రముఖులను పార్టీలోకి ఆహ్వానించే ‘జాయినింగ్ కమిటీ’ (చేరికల కమిటీ)ని భారీగా పునర్వ్యవస్థీకరించింది. నూతన సమీకరణాలు, క్షేత్రస్థాయి విస్తరణే లక్ష్యంగా మరింత విస్తృత అధికారాలు, బాధ్యతలతో సరికొత్త కమిటీని ప్రకటించింది.
తెలంగాణలో గ్రాడ్యుయేట్ ఎమ్మెల్సీ ఎన్నికలతో పాటు రాబోయే స్థానిక సంస్థల ఎన్నికలను దృష్టిలో పెట్టుకుని ప్రతి నియోజకవర్గంలోనూ సమర్థులైన నాయకులను చేర్చుకోవడమే ఈ విస్తరించిన కమిటీ ప్రధాన అజెండాగా నిర్దేశించారు. పార్టీ అధినేత పవన్ కళ్యాణ్ మార్గదర్శకాలకు అనుగుణంగా, సిద్ధాంతాలను నమ్మి పార్టీలోకి వచ్చే వారికి సముచిత స్థానం కల్పించేలా నూతన కమిటీ కార్యాచరణను రూపొందించనుంది. జిల్లాల వారీగా చేరికల ప్రక్రియను వేగవంతం చేసి, కేడర్లో సరికొత్త జోష్ నింపేందుకు పార్టీ ఈ వ్యూహాత్మక మార్పులు చేపట్టింది.