జన గళం విద్యా డెస్క్: ఆంధ్రప్రదేశ్ రాష్ట్రంలో ఉపాధ్యాయ విద్య (బీఈడీ) కోర్సుల్లో ప్రవేశాలకు సంబంధించిన కౌన్సెలింగ్ ప్రక్రియ ఈ నెల 29వ తేదీ నుంచి అధికారికంగా ప్రారంభం కానుంది. ఈ మేరకు ఉన్నత విద్యామండలి సమగ్ర ప్రవేశాల షెడ్యూల్‌ను విడుదల చేసింది. అభ్యర్థులు తమ రిజిస్ట్రేషన్ ప్రక్రియను సెప్టెంబర్ 29 నుంచి అక్టోబరు 5వ తేదీ వరకు ఆన్‌లైన్ ద్వారా పూర్తి చేసుకోవాల్సి ఉంటుంది.
ఇక రిజిస్టర్ చేసుకున్న అభ్యర్థుల ఆన్‌లైన్ సర్టిఫికెట్ పరిశీలన ప్రక్రియ ఈ నెల 30 నుంచి అక్టోబరు 9వ తేదీ వరకు కొనసాగనుంది. అర్హత సాధించిన అభ్యర్థులు కళాశాలల ఎంపిక కోసం వెబ్ ఆప్షన్లను అక్టోబరు 5వ తేదీ నుంచి 8వ తేదీ వరకు నమోదు చేసుకోవడానికి అవకాశం కల్పించారు. అనంతరం అభ్యర్థుల మెరిట్, రిజర్వేషన్లు, వెబ్ ఆప్షన్ల ప్రాధాన్యత ఆధారంగా అక్టోబరు 12వ తేదీన మొదటి విడత సీట్ల కేటాయింపు (సీట్ అలాట్‌మెంట్) చేపట్టనున్నట్లు విద్యాశాఖ అధికారులు వెల్లడించారు. అభ్యర్థులు గడువు తేదీలలోగా ప్రక్రియను పూర్తి చేసుకోవాలని సూచించారు.
