జన గళం ఆంధ్రప్రదేశ్ డెస్క్: విజయవాడ ఇంద్రకీలాద్రిపై శరన్నవరాత్రి దసరా మహోత్సవాలను అత్యంత వైభవోపేతంగా నిర్వహించేందుకు కూటమి ప్రభుత్వం విస్తృత ఏర్పాట్లు చేస్తోంది. ఈ ఉత్సవాలకు దేశవ్యాప్తంగా ఉన్న ప్రముఖులను, వివిధ రాష్ట్రాల ముఖ్యమంత్రులను ఆహ్వానించే కార్యక్రమంలో భాగంగా అస్సాం రాష్ట్ర ముఖ్యమంత్రి హిమంత బిశ్వ శర్మను ఆంధ్రప్రదేశ్ వైద్య ఆరోగ్య శాఖ మంత్రి సత్యకుమార్ యాదవ్, విజయవాడ పార్లమెంట్ సభ్యులు కేశినేని శివనాథ్ చిన్ని మర్యాదపూర్వకంగా కలిశారు. అస్సాం పర్యటనలో ఉన్న నేతలు ముఖ్యమంత్రితో ప్రత్యేకంగా భేటీ అయి దసరా మహోత్సవాల అధికారిక ఆహ్వాన పత్రికను అందజేశారు.
ఇంద్రకీలాద్రిపై కొలువుదీరిన జగన్మాత శ్రీ కనకదుర్గమ్మ వారి దివ్య దర్శనం చేసుకునేందుకు విజయవాడకు విచ్చేయాల్సిందిగా అస్సాం ముఖ్యమంత్రిని నేతలు సాదరంగా ఆహ్వానించారు. నవరాత్రుల పర్వదినాల్లో దుర్గమ్మ వివిధ విశేష అలంకారాలలో భక్తులకు దర్శనమిచ్చే పవిత్రతను, ఇంద్రకీలాద్రి ఆధ్యాత్మిక వైభవాన్ని ఈ సందర్భంగా ముఖ్యమంత్రికి వివరించారు. దేశవ్యాప్తంగా నలుమూలల నుంచి తరలివచ్చే లక్షలాది మంది భక్తుల సమక్షంలో జరిగే ఈ వేడుకలకు హాజరై అమ్మవారి కృపకు పాత్రులు కావాలని కోరారు.
దుర్గమ్మ దర్శనంతో పాటు విజయవాడ నగర చారిత్రక, సాంస్కృతిక ప్రాశస్త్యాన్ని చాటిచెప్పేలా ప్రతిష్ఠాత్మకంగా నిర్వహిస్తున్న ‘విజయవాడ ఉత్సవ్’ వేడుకల్లోనూ ముఖ్య అతిథిగా పాల్గొనాలని అస్సాం ముఖ్యమంత్రిని ఆహ్వానించారు. విజయవాడను దేశంలోనే ప్రముఖ ఆధ్యాత్మిక, పర్యాటక కేంద్రంగా తీర్చిదిద్దేందుకు ఎంపీ కేశినేని చిన్ని ప్రత్యేక చొరవ చూపుతున్నారని, ఈ ఉత్సవాలు వివిధ రాష్ట్రాల మధ్య సాంస్కృతిక సమైక్యతను పెంపొందిస్తాయని నేతలు పేర్కొన్నారు.
ఆంధ్రప్రదేశ్ ప్రతినిధులు అందించిన ఆహ్వానంపై అస్సాం ముఖ్యమంత్రి హిమంత బిశ్వ శర్మ ఎంతో సానుకూలంగా స్పందించారు. కనకదుర్గమ్మ వారి పవిత్ర ఉత్సవాలకు ఆహ్వానం పలకడం పట్ల హర్షం వ్యక్తం చేస్తూ మంత్రి సత్యకుమార్ యాదవ్కు, ఎంపీ కేశినేని చిన్నికి హృదయపూర్వక కృతజ్ఞతలు తెలియజేశారు. ఇంద్రకీలాద్రి అమ్మవారి ఆశీస్సులతో దేశ ప్రజలంతా సుఖసంతోషాలతో వర్ధిల్లాలని ఆకాంక్షించారు.
Slug: vijayawada-dasara-invitation-to-assam-cm-himanta-biswa-sarma-minister-satya-kumar-mp-chinni