జన గళం విజయవాడ డెస్క్: విజయవాడ ఇంద్రకీలాద్రి దుర్గగుడి పరిసరాల్లో భారీ వర్షాల కారణంగా కొండచరియలు విరిగిపడిన ఘటనపై రాష్ట్ర దేవాదాయ, ధర్మాదాయ శాఖ మంత్రివర్యులు శ్రీ ఆనం రామనారాయణ రెడ్డి తీవ్ర దిగ్భ్రాంతి వ్యక్తం చేస్తూ తక్షణమే స్పందించారు. ఆలయ ఉన్నతాధికారులు, ఇంజనీరింగ్ విభాగంతో ఫోన్లో మాట్లాడిన మంత్రి ఘటనకు గల కారణాలు, క్షేత్రస్థాయి పరిస్థితులపై సమగ్ర వివరాలను అడిగి తెలుసుకున్నారు. కొండచరియలు జారిన ప్రాంతాల్లో ఎవరికీ ఎలాంటి ప్రమాదం జరగకుండా తీసుకున్న ముందస్తు చర్యలను ఆరా తీశారు.
అమ్మవారి దర్శనార్థం వచ్చే భక్తుల రక్షణ మరియు భద్రతకే ప్రథమ ప్రాధాన్యత ఇవ్వాలని మంత్రి ఆనం అధికారులను స్పష్టంగా ఆదేశించారు. ప్రస్తుతం కురుస్తున్న వర్షాల దృష్ట్యా కొండపై ప్రమాదకరంగా ఉన్న ప్రాంతాలు, ఘాట్ రోడ్డు, రక్షణ గోడలు (రిటైనింగ్ వాల్స్), మెట్ల మార్గాలపై నిరంతర పర్యవేక్షణ ఉండాలని సూచించారు. కొండపై పేరుకుపోయిన వర్షపు నీరు ఒకేచోట నిలవకుండా డ్రైనేజీ వ్యవస్థను నిరంతరం పర్యవేక్షించాలని, ఎలాంటి అవాంఛనీయ ఘటనలు పునరావృతం కాకుండా రక్షణ వలయాలు, ఇనుప ఫెన్సింగ్‌లను పటిష్టం చేయాలని స్పష్టం చేశారు. త్వరలో దేవీ శరన్నవరాత్రి ఉత్సవాలు ప్రారంభం కానుండటం, భక్తుల రద్దీ లక్షల్లో ఉండే అవకాశం ఉన్నందున ఎక్కడా చిన్నపాటి లోపం కూడా జరగకుండా విపత్తు నిర్వహణ, పోలీసు, రెవెన్యూ శాఖలతో సమన్వయం చేసుకుంటూ పకడ్బందీ చర్యలు చేపట్టాలని మంత్రి ఆదేశాలు జారీ చేశారు.
