జన గళం ఆంధ్రప్రదేశ్ డెస్క్: మాజీ మంత్రి పేర్ని నాని, వైఎస్సార్సీపీ నాయకుడు ఉప్పాల రాములపై కృష్ణా జిల్లా పెడన నియోజకవర్గ తెలుగుదేశం పార్టీ నాయకులు తీవ్రస్థాయిలో విరుచుకుపడ్డారు. పెడనలో ఏర్పాటు చేసిన మీడియా సమావేశంలో టీడీపీ ముఖ్య నేతలు మాట్లాడుతూ, కూటమి ప్రభుత్వంపై మరియు పెడన నియోజకవర్గ ప్రజాప్రతినిధులపై ఉద్దేశపూర్వకంగా చేస్తున్న అసత్య ఆరోపణలు, నిరాధార విమర్శలను తీవ్రంగా ఖండించారు.
గత ఐదేళ్ల వైఎస్సార్సీపీ పాలనలో నియోజకవర్గాన్ని అన్ని విధాలా నాశనం చేసి, అభివృద్ధిని పూర్తిగా గాలికొదిలేసిన నాయకులకు కూటమి ప్రభుత్వాన్ని విమర్శించే నైతిక అర్హత లేదని నేతలు మండిపడ్డారు. ప్రస్తుతం ఎమ్మెల్యే కాగిత కృష్ణ ప్రసాద్ నేతృత్వంలో నియోజకవర్గంలో అభివృద్ధి పనులు వేగవంతం అవుతుంటే ఓర్వలేకనే పేర్ని నాని, ఉప్పాల రాములు నిరాధార ప్రకటనలు చేస్తున్నారని ఆరోపించారు. ప్రజలను తప్పుదోవ పట్టించే చర్యలను ఇకనైనా మానుకోవాలని, లేనిపక్షంలో ప్రజలే తగిన బుద్ధి చెబుతారని హెచ్చరించారు. ప్రజా సంక్షేమమే లక్ష్యంగా కూటమి ప్రభుత్వం పనిచేస్తుందని, ఎన్ని కుట్రలు చేసినా అభివృద్ధిని అడ్డుకోలేరని స్పష్టం చేశారు. ఈ పాత్రికేయుల సమావేశంలో పెడన నియోజకవర్గ టీడీపీ ముఖ్య నేతలు, కార్యకర్తలు పాల్గొన్నారు.
