జన గళం ఆంధ్రప్రదేశ్ డెస్క్: ఉమ్మడి ఆంధ్రప్రదేశ్ శాసనసభ మాజీ డిప్యూటీ స్పీకర్, తెలుగుదేశం పార్టీ రాష్ట్ర ఉపాధ్యక్షులు శ్రీ బూరగడ్డ వేదవ్యాస్ జన్మదినం సందర్భంగా పెడన నియోజకవర్గంతో పాటు ఉమ్మడి కృష్ణా జిల్లా వ్యాప్తంగా అభిమానులు, రాజకీయ నాయకులు, కార్యకర్తలు ఘనంగా శుభాకాంక్షలు తెలిపారు. ఆంధ్రప్రదేశ్ ప్రజల పక్షాన నిలబడి, నిరంతరం ప్రజాసేవకే అంకితమైన నాయకుడిగా వేదవ్యాస్‌కు ప్రత్యేక గుర్తింపు ఉంది.
పెడన నియోజకవర్గ సమగ్రాభివృద్ధిలో బూరగడ్డ వేదవ్యాస్ ముద్ర ఎనలేనిది. మట్టి రోడ్ల స్థానంలో విస్తృతంగా సీసీ రోడ్ల నిర్మాణం చేపట్టి గ్రామీణ రవాణా వ్యవస్థను ఆధునీకరించడంలో ఆయన కీలక పాత్ర పోషించారు. బంటుమిల్లిలో తొలి సమగ్ర విద్యా కళాశాల (ఇంటిగ్రేటెడ్ కాలేజ్) స్థాపన, దాహార్తి తీర్చేందుకు తొలి సమగ్ర తాగునీటి పథకాల రూపకల్పన ఆయన ఘనతే. కృష్ణా మరియు పశ్చిమ గోదావరి జిల్లాలను అనుసంధానించే చారిత్రాత్మక లోసారి వారధి నిర్మాణం ఆయన నాయకత్వ పటిమకు, దూరదృష్టికి నిదర్శనంగా నిలిచింది. గూడూరులో కనెక్టింగ్ రింగ్ రోడ్డు, పెడన, బంటుమిల్లి పరిసర ప్రాంతాల్లో మౌలిక వసతుల కల్పనతో నియోజకవర్గ చరిత్రలోనే సువర్ణాక్షరాలతో లిఖించదగ్గ అభివృద్ధిని సాధించారు. నిస్వార్థ ప్రజా సేవకుడు, అభివృద్ధి ప్రదాత అయిన శ్రీ బూరగడ్డ వేదవ్యాస్ దైవాశీస్సులతో నిండు నూరేళ్లు ఆయురారోగ్యాలు, సుఖసంతోషాలతో వర్ధిల్లాలని ప్రజలు, అభిమాన సంఘాలు మనస్ఫూర్తిగా ఆకాంక్షించాయి.
