జన గళం ఆంధ్రప్రదేశ్ డెస్క్: ఆంధ్రప్రదేశ్ రాష్ట్ర భారతీయ జనతా పార్టీ (BJP) నూతన ఇన్‌చార్జిగా నియమితులైన అరవింద్ సింగ్ భధౌరియా తొలిసారి విజయవాడకు విచ్చేశారు. విజయవాడలో జరగనున్న రాష్ట్ర పదాధికారుల కీలక సమావేశంలో పాల్గొనేందుకు వచ్చిన ఆయనకు గన్నవరం విమానాశ్రయంలో పార్టీ శ్రేణులు ఘన స్వాగతం పలికాయి. నూతన ఇన్‌చార్జి రాకతో పార్టీ శ్రేణుల్లో ఉత్సాహం వెల్లివిరిసింది.
అనంతరం గన్నవరం మండలం కేసరపల్లి గ్రామంలో మండల పార్టీ అధ్యక్షుడు నీలం అశోక్ ఆధ్వర్యంలో నిర్వహించిన ‘మన ఊరు – మన జెండా’ కార్యక్రమంలో అరవింద్ సింగ్ భధౌరియా ఉత్సాహంగా పాల్గొన్నారు. స్థానిక కార్యకర్తలు, నాయకులు ఆయనకు ఘన స్వాగతం పలికారు. జాతీయ భావాలను పెంపొందించేలా చేపట్టిన ఈ కార్యక్రమంలో ప్రముఖులంతా భాగస్వామ్యం కావడం పట్ల స్థానిక శ్రేణులు హర్షం వ్యక్తం చేశాయి.
ఈ కార్యక్రమంలో బీజేపీ రాష్ట్ర అధ్యక్షులు పి.వి.ఎన్. మాధవ్, రాష్ట్ర వైద్య ఆరోగ్య శాఖ మంత్రి సత్యకుమార్ యాదవ్, బీజేపీ రాష్ట్ర కిసాన్ మోర్చా అధ్యక్షులు చిగురుపాటి కుమారస్వామి, రాష్ట్ర ప్రధాన కార్యదర్శి మట్టా ప్రసాద్ తదితర ప్రముఖ నేతలు పెద్ద సంఖ్యలో పాల్గొన్నారు. రాష్ట్రంలో పార్టీ సంస్థాగత బలోపేతం, ప్రజా సమస్యలపై పోరాటాలు మరియు భవిష్యత్ రాజకీయ కార్యాచరణపై ఈ సందర్భంగా నేతలు చర్చించారు.
Slug: bjp-ap-incharge-arvind-singh-bhadoria-gannavaram-kesarapalli-visit