రచన: జన గళం ఇంద్రకీలాద్రి/విజయవాడ డెస్క్: విజయవాడ ఇంద్రకీలాద్రిపై శ్రీ పరాభవ నామ సంవత్సర దసరా శరన్నవరాత్రి మహోత్సవాల (తేది: 11.10.2026 నుండి 20.10.2026 వరకు) సందర్భంగా జగన్మాత శ్రీ దుర్గా మల్లేశ్వర స్వామివార్ల సన్నిధిలో నిర్వహించే విశేష ప్రత్యక్ష పూజా సేవల టికెట్లను అక్టోబర్ 5వ తేదీ సాయంత్రం విడుదల చేస్తున్నట్లు శ్రీ దుర్గా మల్లేశ్వర స్వామివార్ల దేవస్థానం చైర్మన్ బొర్రా రాధాకృష్ణ (గాంధీ), ఈవో వి.కె. శీనానాయక్ అధికారిక ప్రకటనలో వెల్లడించారు. భక్తుల సౌకర్యార్థం పారదర్శకంగా ఆంధ్రప్రదేశ్ ప్రభుత్వ అధికారిక ‘మన మిత్ర’ వాట్సాప్ గవర్నెన్స్ (9552300009) ద్వారా నిర్ణీత సంఖ్యలో టికెట్లను అందుబాటులో ఉంచుతున్నామని తెలిపారు.
నవరాత్రులలో అమ్మవారి సన్నిధిలో జరిగే ప్రత్యేక కుంకుమార్చన, ప్రత్యేక చండీ హోమం, ప్రత్యేక దేవీ ఖడ్గమాలార్చన, ప్రత్యేక శ్రీచక్ర నవావరణార్చన సేవలలో భక్తులు స్వయంగా పాల్గొనేందుకు ఈ టికెట్లు దోహదపడతాయని పేర్కొన్నారు. భక్తులు ‘మన మిత్ర’ వాట్సాప్ సేవలను వినియోగించుకుని ముందస్తుగా టికెట్లను సులభంగా రిజర్వ్ చేసుకోవచ్చని సూచించారు. ఇక అమ్మవారి జన్మనక్షత్రమైన అత్యంత పవిత్రమైన ‘మూలా నక్షత్రం’ (16.10.2026) రోజున సామాన్య భక్తుల రద్దీని దృష్టిలో ఉంచుకుని, ఆ ఒక్క రోజు ప్రత్యక్ష పూజలను నిలిపివేసి అన్ని ప్రత్యేక పూజలను ఆలయ దేవస్థానమే స్వయంగా ‘సర్కార్ సేవ’గా శాస్త్రోక్తంగా నిర్వహిస్తుందని స్పష్టం చేశారు. ఆ రోజు భక్తులు పరోక్ష పూజలను బుక్ చేసుకుని ఇంటి వద్ద నుంచే ఆన్‌లైన్ ద్వారా పాల్గొనవచ్చని, పూజా ప్రసాదాలను వారి చిరునామాకు పోస్ట్ ద్వారా పంపుతామని తెలిపారు. అక్టోబర్ 16 మినహా 11 నుంచి 20 వరకు ప్రత్యక్ష పూజలు ఉంటాయని, టికెట్లు పొందిన వారిని కుమ్మరిపాలెం సెంటర్ వద్ద గల టీటీడీ స్థలం నుంచి ప్రత్యేక వాహనాల్లో కొండపైకి చేరుస్తామని అధికారులు వివరించారు.
