జన గళం చల్లపల్లి/అవనిగడ్డ బ్యూరో: కృష్ణా జిల్లా అవనిగడ్డ నియోజకవర్గంలో వైఎస్సార్ కాంగ్రెస్ పార్టీకి గట్టి ఎదురుదెబ్బ తగిలింది. స్థానిక సంస్థల ఎన్నికలు సమీపిస్తున్న తరుణంలో చల్లపల్లి మండలం లక్ష్మీపురం పంచాయతీ పరిధిలోని రామానగరం గ్రామానికి చెందిన 40 కుటుంబాలు సోమవారం వైసీపీకి గుడ్‌బై చెప్పి తెలుగుదేశం పార్టీలో చేరాయి. అవనిగడ్డ నియోజకవర్గ టీడీపీ ఇన్‌ఛార్జ్ విక్కుర్తి శ్రీనివాసరావు సమక్షంలో ఆయా కుటుంబాల పెద్దలు, యువకులు పసుపు కండువాలు కప్పుకున్నారు. ముఖ్యమంత్రి నారా చంద్రబాబు నాయుడు నేతృత్వంలోని కూటమి ప్రభుత్వం అమలు చేస్తున్న ప్రగతిశీల అభివృద్ధి, సంక్షేమ పథకాలకు ఆకర్షితులై తాము పార్టీలో చేరుతున్నట్లు వారు ప్రకటించారు.
ఈ చేరికల కార్యక్రమంలో విక్కుర్తి శ్రీనివాసరావు మాట్లాడుతూ.. అవనిగడ్డ నియోజకవర్గంలో పార్టీ కోసం కష్టపడుతున్న కార్యకర్తలకు టీడీపీ ఎల్లప్పుడూ వెన్నుదన్నుగా నిలుస్తుందని హామీ ఇచ్చారు. ముఖ్యమంత్రి చంద్రబాబు నాయుడు పరిపాలనలో రాష్ట్రానికి భారీగా పెట్టుబడులు, పరిశ్రమలు వస్తున్నాయని, అమరావతి రాజధాని నిర్మాణ పనులు శరవేగంగా సాగుతుండటంతో రాష్ట్ర భవిష్యత్తుకు భరోసా దక్కిందని తెలిపారు. మౌలిక వసతులు, సాగునీరు, రోడ్ల అభివృద్ధికి కూటమి సర్కారు పెద్దపీట వేస్తోందని పేర్కొన్నారు. రామానగరంలో 40 కుటుంబాలు పార్టీలో చేరడం కూటమి ప్రభుత్వంపై ప్రజల్లో పెరుగుతున్న విశ్వాసానికి నిదర్శనమని, రానున్న స్థానిక సంస్థల ఎన్నికల్లో అవనిగడ్డ నియోజకవర్గంలో కూటమి అభ్యర్థులను భారీ మెజారిటీతో గెలిపించేందుకు నాయకులు, కార్యకర్తలు సమన్వయంతో కృషి చేయాలని పిలుపునిచ్చారు. ఈ కార్యక్రమంలో స్థానిక టీడీపీ ప్రముఖులు, కార్యకర్తలు పెద్ద ఎత్తున పాల్గొన్నారు.
