జన గళం హైదరాబాద్ బ్యూరో: తెలంగాణ శాసనమండలి పరిధిలోని ప్రతిష్టాత్మక హైదరాబాద్ – రంగారెడ్డి – మహబూబ్‌‌నగర్ పట్టభద్రుల (గ్రాడ్యుయేట్) ఎమ్మెల్సీ నియోజకవర్గ ఎన్నికలకు సంబంధించి కేంద్ర ఎన్నికల సంఘం నూతన ఓటర్ల నమోదు ప్రక్రియను ప్రారంభించింది. ఈ మేరకు అర్హులైన పట్టభద్రులు, యువత, మరియు జనసైనికులు ఓటరుగా నమోదు చేసుకునేలా విస్తృత అవగాహన కల్పించాలని జనసేన పార్టీ పిలుపునిచ్చింది. ఈ ప్రక్రియలో భాగంగా ఇప్పటికే ఓటరుగా నమోదై గత ఎన్నికల్లో ఓటు వేసిన వారు సైతం తప్పనిసరిగా మళ్లీ కొత్తగా దరఖాస్తు చేసుకోవాల్సి ఉంటుంది.
ఎన్నికల సంఘం ప్రకటించిన షెడ్యూల్ ప్రకారం సెప్టెంబర్ 28, 2026 నుండి ప్రారంభమైన ఆన్‌లైన్ దరఖాస్తుల ప్రక్రియ నవంబర్ 6, 2026 వరకు కొనసాగనుంది. దరఖాస్తుల పరిశీలన, అభ్యంతరాల స్వీకరణ అనంతరం డిసెంబర్ 30, 2026న తుది ఓటర్ల జాబితాను అధికారికంగా విడుదల చేయనున్నారు. ఏదైనా గుర్తింపు పొందిన విశ్వవిద్యాలయం నుండి ఉత్తీర్ణత సాధించిన ఒరిజినల్ డిగ్రీ లేదా ప్రొవిజనల్ సర్టిఫికెట్ / ఫైనల్ మెమో / కాన్వొకేషన్ సర్టిఫికెట్ మరియు పాస్‌పోర్ట్ సైజు ఫోటోతో తెలంగాణ ఎన్నికల ప్రధానాధికారి (CEO) అధికారిక వెబ్‌సైట్ (ceotelangana.nic.in) ద్వారా ఫారం-18 పూర్తి చేసి ఆన్‌లైన్‌లో దరఖాస్తు చేసుకోవచ్చు. విద్యావంతుల గళాన్ని శాసనమండలిలో వినిపించేందుకు అత్యంత కీలకమైన ఈ పట్టభద్రుల ఎన్నికల్లో ప్రతి జనసైనికుడు స్వయంగా ఓటరుగా నమోదు కావడంతో పాటు తమ పరిధిలోని అర్హులైన ప్రతి పట్టభద్రుడిని నమోదు చేయించాలని కోరారు.
