జన గళం ఆంధ్రప్రదేశ్ డెస్క్: ఆంధ్రప్రదేశ్‌లో కొత్త మద్యం దుకాణాల (వైన్ షాప్స్) లైసెన్సుల జారీ ప్రక్రియకు సంబంధించి రాష్ట్ర ఎక్సైజ్ శాఖ అత్యంత కీలకమైన కొత్త నిబంధనలను తెరపైకి తెచ్చింది. లైసెన్సుల కేటాయింపు కోసం నిర్వహించే లాటరీ ప్రక్రియలో పారదర్శకతను మరింత పెంపొందించేందుకు వీలుగా జనాభా ప్రాతిపదికన కనీస దరఖాస్తుల నిబంధనను ప్రభుత్వం తప్పనిసరి చేసింది. రాష్ట్రవ్యాప్తంగా మొత్తం 807 మద్యం దుకాణాలకు ఎక్సైజ్ శాఖ నోటిఫికేషన్లు జారీ చేయగా, వాటిలో ప్రస్తుతం 510 షాపులకు లాటరీ ద్వారా లైసెన్సులు కేటాయించేందుకు ఏర్పాట్లు ముమ్మరం చేశారు.
ఈ కొత్త నిబంధనల ప్రకారం ఆయా ప్రాంతాల జనాభాను బట్టి దరఖాస్తుల కనీస సంఖ్యను స్పష్టంగా నిర్దేశించారు. దీనివల్ల 50 వేలలోపు జనాభా ఉన్న ప్రాంతాల్లోని మద్యం దుకాణాలకు కనీసం 4 దరఖాస్తులు రావాలని నిబంధన పెట్టారు. అలాగే 50 వేల నుంచి 5 లక్షల వరకు జనాభా ఉన్న ప్రాంతాలకు కనీసం 6 దరఖాస్తులు, అదేవిధంగా 5 లక్షల జనాభా దాటిన ప్రధాన నగర ప్రాంతాలకు కనీసం 8 దరఖాస్తులు తప్పనిసరిగా ఉండాలని ఎక్సైజ్ శాఖ పేర్కొంది. ఈ నిబంధనల అమలు ద్వారా దరఖాస్తుల స్వీకరణ ప్రక్రియలో పారదర్శకత ఉండటంతో పాటు లైసెన్సుల కేటాయింపు సజావుగా సాగనుందని అధికార వర్గాలు వెల్లడించాయి.
Slug: ap-liquor-shop-licenses-new-rules-excise-department-lottery