జన గళం ఆంధ్రప్రదేశ్ డెస్క్: ఎన్టీఆర్ జిల్లా మైలవరం మండలంలోని అన్నా క్యాంటీన్ నిర్వహణకు దాతలు ముందుకు వస్తున్నారు. పేద ప్రజల ఆకలి తీరుస్తున్న అన్నా క్యాంటీన్ ద్వారా ప్రతిరోజూ ఎంతోమంది నిరుపేదలు, కూలీలు పౌష్టికాహారం పొందుతున్నారు. ఈ సత్కార్యానికి తన వంతు సహకారం అందించాలనే ఉద్దేశంతో జయలక్ష్మి అధినేత బయన శ్రీనివాసరావు అన్నా క్యాంటీన్‌కు ఆర్థిక విరాళాన్ని అందజేశారు. తన తల్లిదండ్రులు కీర్తిశేషులు బయన శేషగిరిరావు, రాజ్యలక్ష్మి మరియు అత్తమామలు కీర్తిశేషులు సూరంపల్లి వెంకట సుబ్బారావు, సీతారావమ్మల స్మారకార్థం ఒకరోజు అల్పాహారం మరియు మధ్యాహ్న భోజన ఖర్చుల నిమిత్తం మొత్తం 22,400 రూపాయల విరాళాన్ని ఆయన సమకూర్చారు.
ఈ సందర్భంగా మైలవరం అన్నా క్యాంటీన్ వద్ద ప్రత్యేక కార్యక్రమం నిర్వహించారు. విరాళం అందించిన బయన శ్రీనివాసరావుతో కలిసి మైలవరం నియోజకవర్గ తెలుగు యువత అధ్యక్షులు లంక లతీష్ అన్నా క్యాంటీన్‌కు విచ్చేసిన నిరుపేదలకు, వృద్ధులకు స్వయంగా అల్పాహారం మరియు భోజనం వడ్డించారు. పేద ప్రజల ఆకలి తీర్చడం కంటే గొప్ప సేవ మరొకటి లేదని, తమ పెద్దల జ్ఞాపకార్థం ఒకరోజు పూర్తి ఖర్చులను భరించి విరాళం అందించిన బయన శ్రీనివాసరావు సేవాభావాన్ని లతీష్ అభినందించారు. సమాజంలో ఇటువంటి సత్కార్యాలు మరిన్ని జరగాలని, దాతలు ముందుకు రావడం అభినందనీయమని కొనియాడారు.
అన్నా క్యాంటీన్ల ద్వారా పేద ప్రజలకు నాణ్యమైన భోజనం అందించడంలో ప్రభుత్వం అనుసరిస్తున్న విధానం ఎంతో మందికి ఆసరాగా నిలుస్తోందని నాయకులు తెలిపారు. దాతల సహకారంతో ఈ ప్రజా సంక్షేమ సేవలు మరింత నిరంతరంగా కొనసాగుతున్నాయని పేర్కొన్నారు. ఈ కార్యక్రమంలో పరికల సాంబయ్య, మైక్ బాబురావు, ఎడ్లపల్లి గోవిందరాజు తదితరులు కూటమి నాయకులు, కార్యకర్తలు పెద్ద సంఖ్యలో పాల్గొని సేవా కార్యక్రమంలో పాలుపంచుకున్నారు.
Slug: mylavaram-anna-canteen-donation-bayana-srinivasa-rao