జన గళం విజయవాడ డెస్క్: స్థానిక సంస్థల ఎన్నికల సమరంలో భాగంగా విజయవాడ నగరపాలక సంస్థ (VMC) పరిధిలో ఎన్డీయే కూటమి ప్రచార పర్వం పతాక స్థాయికి చేరుకుంది. గురువారం నాడు విజయవాడ 2వ డివిజన్ పరిధిలో పార్టీ ముఖ్య నాయకులు, కార్యకర్తలతో విస్తృత స్థాయి ఆత్మీయ సమావేశం ఉత్సాహభరిత వాతావరణంలో జరిగింది. ఈ సమావేశంలో కూటమి బలపరిచిన విజయవాడ నగర మేయర్ అభ్యర్థి శ్రీ వంగవీటి రాధాకృష్ణ (రాధా) గారితో పాటు స్థానిక కూటమి నాయకులు, జనసేన, టీడీపీ, బీజేపీ శ్రేణులు పెద్ద సంఖ్యలో పాల్గొన్నారు.
సమావేశంలో డివిజన్ పరిధిలోని క్షేత్రస్థాయి పరిస్థితులు, పోలింగ్ బూత్ స్థాయి కమిటీల పనితీరు, ఓటర్ల వద్దకు కూటమి ఎజెండాను తీసుకెళ్లే కార్యాచరణపై సుదీర్ఘంగా చర్చించారు. ఈ సందర్భంగా నాయకులు మాట్లాడుతూ.. నగరంలో ప్రతి డివిజన్ అభివృద్ధికి కూటమి ప్రభుత్వం కట్టుబడి ఉందని స్పష్టం చేశారు. 2వ డివిజన్‌లోని స్థానిక సమస్యలైన డ్రైనేజీ వ్యవస్థ ఆధునీకరణ, అంతర్గత రహదారుల పునర్నిర్మాణం, రక్షిత మంచినీటి సరఫరా వంటి అంశాలకు ప్రాధాన్యతనిస్తూ డివిజన్‌ను ఆదర్శంగా తీర్చిదిద్దుతామని హామీ ఇచ్చారు. కార్యకర్తలే పార్టీకి పట్టుగొమ్మలని, ప్రతి ఒక్కరూ సైనికుల్లా గడపగడపకూ వెళ్లి ఓటర్లను చైతన్యపరచాలని పిలుపునిచ్చారు. బెజవాడ సమగ్ర ప్రగతి కోసం, అవినీతి రహిత పాలన కోసం ‘గాజు గ్లాస్’ గుర్తుపై ఓటు వేసి మేయర్ అభ్యర్థితో పాటు కార్పొరేటర్ అభ్యర్థిని రికార్డు స్థాయి మెజారిటీతో గెలిపించాలని డివిజన్ ప్రజలకు విజ్ఞప్తి చేశారు.
