అమరావతి: ఆంధ్రప్రదేశ్ ఉప ముఖ్యమంత్రి, జనసేన పార్టీ అధినేత శ్రీ పవన్ కళ్యాణ్ గారి వ్యక్తిగత జీవితంలో చోటుచేసుకున్న తాజా పరిణామంపై జనసేన పార్టీ రాష్ట్ర కార్యదర్శి అమిశెట్టి వాసు తీవ్ర భావోద్వేగంతో స్పందించారు. ఒక మనిషి వ్యక్తిగత జీవితాన్ని చూసి కాదని, ఆయన నిస్వార్థ వ్యక్తిత్వాన్ని, ప్రజల సంక్షేమం కోసం చేసే నిరంతర పోరాటాన్ని చూసే తాము అభిమానిస్తున్నామని ఆయన స్పష్టం చేశారు.
ఈ సందర్భంగా అమిశెట్టి వాసు మాట్లాడుతూ.. సమాజం కోసం, ప్రజా సమస్యల పరిష్కారం కోసం తన జీవితాన్ని, సమయాన్ని, వ్యక్తిగత సుఖసంతోషాలను పక్కనపెట్టి నిరంతరం శ్రమిస్తున్న ఒక నాయకుడికి కూడా మనసు, సున్నితమైన భావోద్వేగాలు, వ్యక్తిగత బాధలు ఉంటాయని గుర్తుచేశారు. నాయకుడు అంటే రాయిలాంటి మనిషి కాదని, ఆయనకు కూడా కుటుంబం, అనుబంధాలు, అనేక వ్యక్తిగత సంఘర్షణలు ఉంటాయని వివరించారు. ఆయన రాజకీయ జీవితాన్ని చూసి అభిమానించే ప్రతి ఒక్కరూ ఆయన వ్యక్తిగత జీవితంలో ఎదురయ్యే పరిస్థితులను కూడా మానవత్వ దృక్పథంతో అర్థం చేసుకోవాలని కోరారు.
వైవాహిక బంధం ముగింపు అనేది పూర్తిగా ఇరువురి వ్యక్తిగత విషయమని, అందులో ఎవరు తప్పో, ఎవరు ఒప్పో తీర్పులు చెప్పాల్సిన అవసరం సమాజానికి లేదని తేల్చిచెప్పారు. ఇరువైపులా వారి గౌరవాన్ని కాపాడటం, వారి పిల్లల మనోభావాలను గౌరవించడమే నాగరిక సమాజ బాధ్యత అని పేర్కొన్నారు. పవన్ కళ్యాణ్ గారి వ్యక్తిగత జీవితంలో ఎలాంటి పరిస్థితులు ఎదురైనా, రాష్ట్ర ప్రజల కోసం ఆయన చేస్తున్న నిస్వార్థ సేవలకు, సమాజం పట్ల ఆయనకున్న అంకితభావానికి ఇచ్చే గౌరవం ఎన్నటికీ తగ్గదని అమిశెట్టి వాసు స్పష్టం చేశారు.