అమరావతి: ఉప ముఖ్యమంత్రి, జనసేన అధినేత శ్రీ పవన్ కళ్యాణ్ గారు, ఆయన సతీమణి అన్నా లెజ్నోవా గారు పరస్పర అవగాహన, గౌరవంతో విడిపోతున్నట్లు వెల్లడించిన వ్యక్తిగత అంశాన్ని కొందరు సోషల్ మీడియాలో వివాదాస్పదం చేయడంపై రాజకీయ విశ్లేషకులు, జనసేన నాయకులు సింగలూరి శాంతి ప్రసాద్ తీవ్రస్థాయిలో ధ్వజమెత్తారు. వివాహమైనా, విడాకులైనా, ఆస్తుల పంపకాలైనా అవి ఏ కుటుంబంలోనైనా పూర్తిగా వారి వ్యక్తిగత పరిధిలోని అంశాలని, వాటిని రాష్ట్ర అభివృద్ధికి, ప్రజా సంక్షేమానికి ముడిపెడుతూ మాట్లాడటం నీచమైన వెకిలితనానికి పరాకాష్ట అని ఆయన మండిపడ్డారు.
ఈ సందర్భంగా ఆయన పలు కీలక అంశాలను విశ్లేషిస్తూ.. వైఎస్సార్ కుటుంబంలో ఆస్తుల పంపకం వ్యవహారాలను జనసైనికులు ఎన్నడూ తప్పుబట్టలేదని గుర్తుచేశారు. కేవలం ఎన్నికల లబ్ధి కోసం తల్లిని, చెల్లిని రాజకీయాల్లో వాడుకుని, ఆ తర్వాత నిర్దాక్షిణ్యంగా పక్కనపెట్టిన రాజకీయ అవకాశవాదాన్ని మాత్రమే ప్రశ్నించామని స్పష్టం చేశారు. ఎందుకంటే వారు ప్రత్యక్షంగా రాజకీయ ప్రచారంలో పాల్గొని ప్రభావితం చేశారు కాబట్టి. అయితే, అన్నా లెజ్నోవా గారు కానీ, వైఎస్ భారతి రెడ్డి గారు కానీ, నారా భువనేశ్వరి గారు కానీ రాజకీయ పార్టీల అధినేతల ధర్మపత్నులుగా కుటుంబానికే పరిమితమయ్యారని, ప్రత్యక్ష రాజకీయాల్లో లేని మహిళల వ్యక్తిగత విషయాలపై మాట్లాడే నైతిక హక్కు ఎవరికీ లేదని తేల్చిచెప్పారు.
వైఎస్ షర్మిల గారు ఒక రాజకీయ పార్టీకి అధినేత్రిగా ఉన్నందున ఆమె రాజకీయ విధానాలను విమర్శించవచ్చేమో కానీ, ఆమె భర్త, పిల్లల వ్యక్తిగత విషయాలు ఎవరికీ అనవసరమని పేర్కొన్నారు. ప్రజాప్రతినిధుల వ్యక్తిగత జీవితాలు ప్రజల దైనందిన జీవనాన్ని గానీ, రాష్ట్ర భవిష్యత్తును గానీ నిర్దేశించవని, పక్కవారి ఇంట్లో జరిగే సున్నితమైన అంశాలను చూసి పైశాచికానందం పొందే వికృత మనస్తత్వం ఉన్నవారు సమాజానికి పట్టిన చీడ మాత్రమేనని సింగలూరి శాంతి ప్రసాద్ ఘాటుగా స్పష్టం చేశారు.