విజయవాడ, 2026 సెప్టెంబర్ 19, (జనగళం బ్యూరో):
రాష్ట్రంలో ఉపాధ్యాయ నియామక ప్రక్రియ (డీఎస్సీ) స్పోర్ట్స్ కోటా విభాగంలో జరిగిన భారీ అవకతవకలు, దొడ్డిదారిన జరిగిన పోస్టుల కేటాయింపులపై కేంద్ర దర్యాప్తు సంస్థ (సీబీఐ)తో తక్షణమే సమగ్ర విచారణ జరిపించాలని మాజీ మంత్రి, వైఎస్సార్ కాంగ్రెస్ పార్టీ పశ్చిమ నియోజకవర్గ ఇన్ఛార్జ్ వెలంపల్లి శ్రీనివాసరావు కూటమి ప్రభుత్వాన్ని డిమాండ్ చేశారు. ఏళ్ల తరబడి కష్టపడి మెడల్స్ సాధించిన ప్రతిభావంతులైన క్రీడాకారులను పక్కనపెట్టి నిబంధనలకు విరుద్ధంగా వ్యవహరించడం క్షమించరాని నేరమని మండిపడ్డారు. అర్హులైన ప్రతి బాధిత అభ్యర్థికి పూర్తి న్యాయం చేకూరే వరకు వైఎస్సార్సీపీ అండగా నిలబడి పోరాడుతుందని స్పష్టం చేశారు.
వివరాలు ఇలా ఉన్నాయి, డీఎస్సీ స్పోర్ట్స్ కోటాలో జరిగిన అక్రమాలకు నిరసనగా, నష్టపోయిన నిరుద్యోగ అభ్యర్థులకు మద్దతుగా ఈ నెల 21వ తేదీన విజయవాడ నగరంలో భారీ ఎత్తున శాంతియుత నిరసన ర్యాలీ చేపట్టనున్నట్లు ఆయన ప్రకటించారు. ఈ ర్యాలీ కస్తూరిభాయ్పేటలోని రెడ్ సర్కిల్ (బిషప్ అజరయ్య ఉమెన్స్ కళాశాల సమీపం) నుంచి ఉదయం ప్రారంభమై, బందరు రోడ్డులోని ఆంధ్రప్రదేశ్ క్రీడా ప్రాధికార సంస్థ (శాప్) ప్రధాన కార్యాలయం వరకు కొనసాగుతుందన్నారు. అనంతరం ‘శాప్’ ఉన్నతాధికారులను కలిసి నియామకాల్లో జరిగిన గోల్మాల్పై నిష్పక్షపాత విచారణ కోరుతూ అధికారికంగా వినతిపత్రం అందజేయనున్నట్లు వివరించారు.
పశ్చిమ నియోజకవర్గ కార్యాలయంలో సమరశంఖం – సన్నాహక భేటీ:
ఈ నిరసన కార్యక్రమ కార్యాచరణ, ఏర్పాట్లపై శనివారం నాడు విజయవాడ బ్రాహ్మణ వీధిలోని వైఎస్సార్సీపీ పశ్చిమ నియోజకవర్గ కార్యాలయంలో ముఖ్య నాయకులతో విస్తృత స్థాయి సన్నాహక సమావేశం నిర్వహించారు. వెలంపల్లి శ్రీనివాసరావు అధ్యక్షతన జరిగిన ఈ సమావేశంలో పశ్చిమ పరిధిలోని వివిధ డివిజన్ల మాజీ కార్పొరేటర్లు, వార్డు అధ్యక్షులు, క్లస్టర్ ఇన్ఛార్జులు, పార్టీ అనుబంధ విభాగాల ప్రతినిధులు హాజరయ్యారు.
ఈ సందర్భంగా వెలంపల్లి మాట్లాడుతూ.. నిరుద్యోగ యువత, క్రీడారంగాన్ని నమ్ముకున్న విద్యార్థుల జీవితాలతో కూటమి ప్రభుత్వం ఆటలాడుతోందని తీవ్ర ఆగ్రహం వ్యక్తం చేశారు. అర్హత లేని వారికి కట్టబెట్టే కుట్రలను ప్రజల ముందు ఎండగడతామన్నారు. 21న నిర్వహించే భారీ శాంతియుత ర్యాలీకి పార్టీ శ్రేణులు, యువజన, విద్యార్థి విభాగాల ప్రతినిధులు, క్రీడా సంఘాల నాయకులు, బాధితులు స్వచ్ఛందంగా తరలివచ్చి విజయవంతం చేయాలని పిలుపునిచ్చారు.