జన గళం ఆంధ్రప్రదేశ్ డెస్క్: అన్నమయ్య జిల్లా మదనపల్లి పట్టణంలోని ఆర్.ఆర్. ఫంక్షన్ హాల్‌లో జిల్లా స్త్రీ మరియు శిశు సంక్షేమ శాఖ ఆధ్వర్యంలో పోషణ్ మాసం వేడుకల్లో భాగంగా పోషణ్ అభియాన్ కార్యక్రమం అత్యంత వైభవంగా నిర్వహించబడింది. మదనపల్లి శాసనసభ్యులు షాజహాన్ బాషాతో కలిసి జిల్లా కలెక్టర్ నిశాంత్ కుమార్ జ్యోతి ప్రజ్వలన చేసి ఈ కార్యక్రమాన్ని లాంఛనంగా ప్రారంభించారు. ఈ సందర్భంగా జిల్లాలో అంగన్‌వాడీ వ్యవస్థ ద్వారా మహిళలు, చిన్నారుల ఆరోగ్యం కోసం అంగన్‌వాడీ కార్యకర్తలు అందిస్తున్న సేవలు అభినందనీయమని కలెక్టర్ కొనియాడారు. గ్రామీణ స్థాయిలో పోషకాహార లోపం నివారణతో పాటు బాల్య వివాహాలు, టీనేజ్ గర్భధారణల నియంత్రణపై ప్రత్యేక దృష్టి పెట్టాలని అధికారులను ఆదేశించారు.
ప్రజల రోజువారీ ఆహారంలో చిరుధాన్యాలను విరివిగా భాగం చేయాల్సిన అవసరం ఉందని కలెక్టర్ నిశాంత్ కుమార్ స్పష్టం చేశారు. రాయలసీమ ప్రాంతంలో సంప్రదాయంగా వినియోగించే జొన్నలు, కొర్రలు వంటి చిరుధాన్యాలను అంగన్‌వాడీ కేంద్రాల మెనూలో చేర్చేలా చర్యలు తీసుకోవాలని సూచించారు. అంగన్‌వాడీ పరిధిలోని లబ్ధిదారుల కుటుంబాల్లో చిరుధాన్యాల వినియోగంపై ప్రత్యేక సర్వే నిర్వహించాలన్నారు. పద్దెనిమిది సంవత్సరాల లోపు గర్భధారణలను అరికట్టేందుకు అంగన్‌వాడీ సూపర్‌వైజర్లు, సిబ్బంది సమన్వయంతో క్షేత్రస్థాయిలో నిరంతరం అవగాహన కార్యక్రమాలు చేపట్టాలని పిలుపునిచ్చారు. మహిళలు, చిన్నారుల సంక్షేమానికి కూటమి ప్రభుత్వం అత్యంత ప్రాధాన్యత ఇస్తోందని పేర్కొన్నారు.
ఈ కార్యక్రమంలో పాల్గొన్న మదనపల్లి ఎమ్మెల్యే షాజహాన్ బాషా మాట్లాడుతూ చిన్నారుల సంరక్షణలో అంగన్‌వాడీల పాత్ర అమూల్యమైనదని ప్రశంసించారు. అద్దె భవనాల్లో కొనసాగుతున్న అంగన్‌వాడీ కేంద్రాలకు ప్రభుత్వ స్థలాలు కేటాయించి శాశ్వత భవనాలు నిర్మించాలని కలెక్టర్‌ను కోరారు. ఈ వేడుకల్లో భాగంగా స్వచ్ఛ అంగన్‌వాడీ అవార్డులు సాధించిన అన్నమయ్య జిల్లాకు చెందిన పలువురు అంగన్‌వాడీ కేంద్రాలు మరియు సిబ్బందిని ఘనంగా సత్కరించారు. అలాగే గర్భిణులకు శ్రీమంతం, చిన్నారులకు అన్నప్రాసన కార్యక్రమాలు నిర్వహించి ఆశీర్వదించారు. ఈ కార్యక్రమంలో జిల్లా స్త్రీ మరియు శిశు సంక్షేమ శాఖ పీడీ హైమవతి, సీడీపీవోలు, అంగన్‌వాడీ, ఆశా కార్యకర్తలు మరియు కూటమి నాయకులు పెద్ద సంఖ్యలో పాల్గొన్నారు.
Slug: madanapalle-poshan-abhiyaan-collector-nishant-kumar-mla-shahjahan-basha