జన గళం రాజమహేంద్రవరం బ్యూరో: రాబోయే మున్సిపల్ కార్పొరేషన్ ఎన్నికల్లో రాజమండ్రి నగరపాలక సంస్థ (RMC) మేయర్ అభ్యర్థిగా జనసేన సీనియర్ నాయకుడు, నిరంతర ప్రజాసేవకుడు యర్నాగుల శ్రీనివాస్‌కు అవకాశం కల్పించాలని స్థానిక జనసైనికులు, వీర మహిళలు పార్టీ అధినేత పవన్ కళ్యాణ్‌ను కోరుతున్నారు. సుమారు 35 సంవత్సరాలుగా మెగాస్టార్ చిరంజీవి అభిమానిగా, సేవా కార్యకర్తగా ప్రస్థానం ప్రారంభించిన ఆయన.. ప్రజారాజ్యం పార్టీ సమయంలో జిల్లా అధ్యక్షుడిగా బాధ్యతలు నిర్వర్తించి ‘వై శ్రీనివాస్’గా ప్రజల మన్ననలు పొందారు.
ప్రజారాజ్యం హయాంలో రక్తదాన శిబిరాలు, సైకిళ్ల పంపిణీ, వృద్ధులు, వికలాంగులకు విశేష సేవలందించడంతో పాటు ఆపదలో ఉన్నవారికి రక్తం అందించే సంజీవనిగా నిలిచారు. కంబాలచెరువు సెంటర్‌లో చిరంజీవి బస్టాండ్, చిరంజీవి పార్క్, మదర్ తెరిసా విగ్రహాన్ని నెలకొల్పిన సేవా చరిత్ర ఆయన సొంతమని శ్రేణులు గుర్తుచేస్తున్నాయి. 2014లో జనసేన పార్టీ ఆవిర్భావం నుండి రాజమండ్రి గడ్డపై పార్టీని క్షేత్రస్థాయిలో మోస్తూ, ఎంతోమంది యువకులను నాయకులుగా తీర్చిదిద్దిన నిబద్ధత కలిగిన కష్టజీవి యర్నాగుల శ్రీనివాస్ అని పేర్కొన్నారు. నిష్కర్ష, నిజాయితీ, సేవా దృక్పథం కలిగిన శ్రీనివాస్‌కు మేయర్ అభ్యర్థిగా అవకాశం కల్పిస్తేనే రాజమండ్రి సమగ్ర అభివృద్ధి సాధ్యమవుతుందని కేడర్ విజ్ఞప్తి చేస్తోంది.
