జన గళం ఆంధ్రప్రదేశ్ డెస్క్: భారతదేశాన్ని సిసలైన భాగ్యసీమగా తీర్చిదిద్దేందుకు ప్రధాని నరేంద్ర మోదీ అవిశ్రాంతంగా పాటుపడుతున్నారని, ఆయన రాజకీయ ప్రస్థానం 25 సంవత్సరాలు పూర్తి చేసుకున్న సందర్భంగా సేవా కార్యక్రమాలు నిర్వహించడం ఎంతో ముదావహమని జిల్లా తెలుగుదేశం పార్టీ అధ్యక్షులు, ఏలూరు శాసనసభ్యులు బడేటి చంటి స్పష్టం చేశారు. ప్రధాని మోదీ పాతికేళ్ల ప్రజా ప్రస్థానాన్ని పురస్కరించుకుని ఏలూరులోని జిల్లా సర్వజనాసుపత్రిలో వైద్య, ఆరోగ్య మరియు కుటుంబ సంక్షేమ శాఖ ఆధ్వర్యంలో ‘సేవా సంకల్ప అభియాన్’ కార్యక్రమం అత్యంత వైభవంగా నిర్వహించారు. ఇందులో భాగంగా ఆసుపత్రి ప్రాంగణంలో ఏర్పాటు చేసిన మెగా వైద్య శిబిరాన్ని ఎమ్మెల్యే బడేటి చంటితో పాటు ఆర్టీసీ విజయవాడ జోన్-2 ఛైర్మన్, ఏలూరు జనసేన ఇన్‌ఛార్జ్ రెడ్డి అప్పలనాయుడు, బీజేపీ జిల్లా అధ్యక్షులు చౌటుపల్లి విక్రమ్ కిషోర్, అసిస్టెంట్ కలెక్టర్ శ్రావణ్‌కుమార్ రెడ్డి లాంఛనంగా ప్రారంభించారు.
తొలుత మెగా వైద్య శిబిరాన్ని సందర్శించిన అತಿథులు, అక్కడ రోగులకు అందుతున్న వైద్య సేవల వివరాలను స్వయంగా అడిగి తెలుసుకున్నారు. అనంతరం నిర్వహించిన సభలో ఎమ్మెల్యే బడేటి చంటి మాట్లాడుతూ, జన నిర్లక్ష్యమే అనేక వ్యాధుల వ్యాప్తికి ముఖ్య కారణమని అభిప్రాయపడ్డారు. ప్రజల్లో ఆరోగ్య భద్రతపై అవగాహన పెంపొందించాల్సిన బాధ్యత వైద్య సిబ్బందిపై ఉందని సూచించారు. మనుషులకు ఆయుష్షు పోసేది బ్రహ్మదేవుడైతే, పునర్జన్మనిచ్చేది వైద్యులు మరియు ఆరోగ్య సిబ్బంది అని కొనియాడారు. ప్రధాని మోదీ పాతికేళ్ల రాజకీయ ప్రస్థానాన్ని పురస్కరించుకుని నెల రోజుల పాటు ఇలాంటి వైద్య శిబిరాలు నిర్వహించడం అభినందనీయమని, ఆయన మరిన్ని సేవలు అందిస్తూ ఆయురారోగ్యాలతో వర్ధిల్లాలని ఆకాంక్షించారు. అంతేకాకుండా, రానున్న డిసెంబర్ నాటికి జిల్లా ఆసుపత్రిని అన్నివిధాలా మరింత అభివృద్ధి చేసేందుకు పటిష్ట చర్యలు చేపట్టనున్నట్లు ఆయన స్పష్టం చేశారు.
ఈ కార్యక్రమంలో పాల్గొన్న ఆర్టీసీ జోన్-2 ఛైర్మన్ రెడ్డి అప్పలనాయుడు మాట్లాడుతూ, వైద్య రంగంలో సేవ అనేది నిరంతర ప్రక్రియ అని, దానికి కొనసాగింపుగా ప్రధాని మోదీ ప్రస్థాన వేడుకల్లో భాగంగా ప్రత్యేక మెగా వైద్య శిబిరాలు నిర్వహించడం అభినందనీయమని పేర్కొన్నారు. బీజేపీ జిల్లా అధ్యక్షులు విక్రమ్ కిషోర్ మాట్లాడుతూ దేశాభివృద్ధికి ప్రధాని మోదీ చేపడుతున్న సంక్షేమ, అభివృద్ధి చర్యలను వివరించారు. ఈ కార్యక్రమంలో డీఎంఅండ్‌హెచ్‌వో డాక్టర్ శోభ, డీసీహెచ్‌ఎస్ డాక్టర్ బేబీ కమల, టీడీపీ ఏలూరు అసెంబ్లీ నియోజకవర్గ పరిశీలకులు మీరావలీ, డీఐవో డాక్టర్ పుల్లయ్య, ఆసుపత్రి మెడికల్ సూపరింటెండెంట్ డాక్టర్ శ్యామల, జనసేన ఏలూరు నగర అధ్యక్షులు వీరంకి పండు, నాయకులు రెడ్డి గౌరీ శంకర్, నగిరెడ్డి కాశీ నరేష్, బోండా రాము నాయుడు, బెజవాడ నాగభూషణం కుమార్ తదితర కూటమి పార్టీల నేతలు, కార్యకర్తలు పెద్ద సంఖ్యలో పాల్గొన్నారు.
Slug: eluru-government-hospital-seva-sankalpa-abhiyan-mega-medical-camp-modi-25-years