జన గళం కృష్ణా జిల్లా డెస్క్: కృష్ణా జిల్లా బంటుమిల్లి మండలంలో గురువారం జరిగిన ఒక రోడ్డు ప్రమాదం స్థానికంగా తీవ్ర కలకలం రేపింది. బంటుమిల్లి నుంచి పెందురు హైవే వెళ్లే రహదారి సమీపంలో రెండు ద్విచక్ర వాహనాలు ఢీకొనడంతో ఒక్కసారిగా భారీ మంటలు చెలరేగాయి. ఈ ప్రమాదంలో రెండు బైకులు పూర్తిగా అగ్నికి ఆహుతై అటాకైపోయాయి.
స్థానికులు మరియు అగ్నిమాపక సిబ్బంది తెలిపిన వివరాల ప్రకారం.. ప్రయాణం చేస్తూ ఫోన్ మాట్లాడడం లేదా ఒక్కసారిగా బైకును పక్కకు తిప్పడం వల్ల వెనుక నుంచి వస్తున్న మరో ద్విచక్ర వాహనం బలంగా ఢీకొన్నట్లు తెలుస్తోంది. ఈ ప్రమాద తీవ్రతకు ఒక్కసారిగా మంటలు వ్యాపించి రెండు బైకులు పూర్తిగా కాలి బూడిదయ్యాయి.
సమాచారం అందుకున్న వెంటనే బంటుమిల్లి ఫైర్ ఆఫీసర్ గరికపాటి రామ్మోహన్ రావు పర్యవేక్షణలో అగ్నిమాపక సిబ్బంది హుటాహుటిన సంఘటనా స్థలానికి చేరుకున్నారు. అగ్నిమాపక వాహనంతో శ్రమించి మంటలను పూర్తిగా అదుపులోకి తీసుకొచ్చారు. అయితే అప్పటికే రెండు ద్విచక్ర వాహనాలు పూర్తిగా దగ్ధమవ్వడంతో సుమారు రూ. 2 లక్షల 90 వేల వరకు ఆస్తినష్టం వాటిల్లినట్లు ఫైర్ సిబ్బంది అంచనా వేశారు. వాహనాలు నడిపేటప్పుడు మొబైల్ ఫోన్లు ఉపయోగించడం వల్ల ఎంతటి ప్రమాదాలు కొనితెచ్చుకోవాల్సి వస్తుందో ఈ ఘటనే నిదర్శనమని స్థానికులు ఆందోళన వ్యక్తం చేశారు. ఈ సహాయక చర్యల్లో లీడింగ్ ఫైర్ ఆఫీసర్ కె. నాగేంద్రరావు, డ్రైవర్ కం ఆపరేటర్ ఏ. ఉమామహేశ్వరరావు, ఫైర్మన్ నవీన్ బాబు తదితరులు పాల్గొని అగ్నిప్రమాదం మరింత విస్తరించకుండా నివారించారు.
Slug: bantumilli-bike-collision-fire-accident-property-loss