జన గళం ఆంధ్రప్రదేశ్ డెస్క్: ప్రజల సమస్యలను నేరుగా తెలుసుకుని వాటికి తక్షణ పరిష్కారం చూపడమే లక్ష్యంగా ఎన్టీఆర్ జిల్లా విజయవాడ రూరల్ పరిధిలోని గొల్లపూడిలో ఉన్న కార్యలయంలో ప్రజా సమస్యల పరిష్కార వేదిక ప్రజాదర్బార్ కార్యక్రమం అత్యంత ప్రతిష్టాత్మకంగా నిర్వహించారు. ఈ కార్యక్రమంలో మైలవరం శాసనసభ్యులు మరియు తెలుగుదేశం పార్టీ రాష్ట్ర అధికార ప్రతినిధి వసంత వెంకట కృష్ణప్రసాదు పాల్గొని వివిధ ప్రాంతాల నుంచి తరలివచ్చిన ప్రజల నుంచి వినతి పత్రాలను స్వీకరించారు. నియోజకవర్గంలోని నలుమూలల నుంచి వచ్చిన ప్రజలు తమ ఇబ్బట్లను ఎమ్మెల్యే దృష్టికి తీసుకువచ్చేందుకు ఈ వేదిక ఎంతో ఉపయోగపడింది.
ఈ ప్రజాదర్బార్లో ప్రధానంగా పంచాయతీరాజ్, ఆర్డబ్ల్యూఎస్, రెవెన్యూ శాఖలకు సంబంధించిన అంశాలతో పాటు ఇళ్ల స్థలాలు, సామాజిక పింఛన్లు మరియు ఇతర ప్రభుత్వ సంక్షేమ పథకాలకు సంబంధించి ప్రజలు పెద్ద ఎత్తున అర్జీలను సమర్పించారు. వచ్చిన ప్రతి అర్జీని ఎమ్మెల్యే వసంత కృష్ణప్రసాదు సావధానంగా పరిశీలించి, వాటికి సంబంధించిన పూర్తి వివరాలను బాధితుల ద్వారా అడిగి తెలుసుకున్నారు. ప్రజలు ఎదుర్కొంటున్న సమస్యల తీవ్రతను బట్టి సంబంధిత శాఖల అధికారులతో మాట్లాడి, నిబంధనల మేరకు సాధ్యమైనంత త్వరగా ఆ సమస్యలను పరిష్కరించాలని ఆదేశాలు జారీ చేశారు.
ప్రజలకు నిత్యం అందుబాటులో ఉంటూ వారి సమస్యలకు శాశ్వత ప్రాతిపదికన పరిష్కారం చూపడమే తన ప్రధాన ధ్యేయమని ఎమ్మెల్యే కృష్ణప్రసాదు ఈ సందర్భంగా స్పష్టం చేశారు. ప్రతి ఒక్కరు తమ సమస్యలను ఎలాంటి సంకోచం లేకుండా నేరుగా తన దృష్టికి తీసుకువచ్చేలా ఈ ప్రజాదర్బార్ను నిర్వహిస్తున్నామని తెలిపారు. ప్రభుత్వ సంక్షేమ పథకాలు, అభివృద్ధి కార్యక్రమాలు క్షేత్రస్థాయిలో అర్హులైన ప్రతి లబ్ధిదారుడికి పారదర్శకంగా అందేలా నిరంతరం పర్యవేక్షిస్తామని, ప్రజాప్రయోజనాలే పరమావధిగా తమ పాలన కొనసాగుతుందని ఆయన పునరుద్ఘాటించారు.
Slug: mylavaram-mla-vasantha-krishna-prasad-gollapudi-praja-darbar